RFL
Kigali

Nigeria: Bola Ahmed Tinubu yatorewe kuba Perezida w'igihugu

Yanditswe na: Dushime Nina Cynthia
Taliki:1/03/2023 10:04
0


Abayobozi b'amatora y'umukuru w'igihugu muri Nigeria, batangaje ko umukandida w'ishyaka risanzwe ku butegetsi, Bola Ahmed Tinubu, yatsinze amatora yo kuba Perezida w'igihugu muri 2023.



Nyuma yo kwegura ku butegetsi kwa Perezida Muhammadu Buhari wari umaze manda ebyiri ayobora igihugu cya Nigeria, abanyanijeriya benshi bari bahanze amaso umuyobozi uzava mu matora y'umukuru w'igihugu, yabaye ku wa Gatandatu, tariki ya 25 Gashyantare 2023.

Bola Tinubu, umukandinda w'ishyaka, All Progressive Congress (APC), risanzwe ku butegetsi, yatsindiye ku majwi Miliyoni 8.8, mu gihe mugenzi we bari bahanganye wo mu ishyaka rya Peoples Democratic Party (PDP), Atiku Abubakar, yagize amajwi Miliyoni 6.9 naho Peter Obi wo mu ishyaka rya Labour Party atsindira amajwi Miliyoni 6.1.

Komisiyo y'amatora muri Nigeria, Independent National Electoral Commission (INEC), yatangaje ko Bola Tinubu yabonye amajwi 25% asabwa muri bibiri bya gatatu muri leta 36 z'iki gihugu, no mu murwa mukuru Abuja, ndetse bikaba byemejwe ko ari we Perezida w'igihugu. 

Umuyobozi wa INEC, Mahmood Yakubu, yagize ati "Tinubu Bola Ahmed, wo mu ishyaka rya APC, amaze kubahiriza ibisabwa n'amategeko, bitangajwe ko ari we watsinze ndetse akaba yatorewe (kuyobora igihugu)."

Bola Tinubu w'imyaka 70 amaze igihe kinini muri politiki, ndetse yabaye Guverineri wa Lagos kuva mu 1999 kugeza muri 2007, mu kwiyamamaza kwe yagize ati "Iki ni igihe cyanjye" cyo kuyobora ubukungu bukomeye bwa Afurika.

Mu kwiyamamaza kwa Bola, yasezeranyije abanyanijeriya "Ibyiringiro bishya" ariko ntibyavugwaho rumwe n'abo bahanganye, bagaruka cyane ku bibazo by'ubuzima bw'umubiri we n'ibirego byo mu gihe cyashize.

By'umwihariko bagaruka ku mubano wa hafi afitanye na Perezida wari usanzwe ku butegetsi, Muhammadu Buhari, benshi banenga ko yananiwe gushyira mu masezerano kugarura umutekano muri Nigeria.  

Abavuga rumwe n'ubutegetsi bari bishimye babyina injyana ya Afrobeats hanze y'icyicaro gikuru cya APC, kiri mu murwa mukuru Abuja, ubwo batangazaga ibisubizo bya nyuma byavuye mu matora, mu rukerera rwo kuri uyu wa gatatu, tariki ya 1 Werurwe 2023. 

Umukandida mu ishyaka rya APC, Bola Tinubu yatsindiye kuba Perezida wa Nigeria  

Bola Ahmed Tinubu yabaye guverineri wa Lagos kuva mu 1999 kugeza muri 2007 ndetse akaba yari umukandida w'ishyaka risanzwe ku butegetsi mu matora y'umukuru w'igihugu 2023






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND