RFL
Kigali

Kwirengagiza Ramos na De Gea mu byatumye Luiz Enrique watozaga Espagne ahirikanwa inyota

Yanditswe na: Ngabo Mihigo Frank
Taliki:8/12/2022 17:58
0


Luiz Enrique Martinez Garcia yakuwe ku mwanya w'umutoza mukuru w'ikipe y'igihugu ya Espagne muri ruhago, nyuma y'aho we n'abakinnyi be basezerewe na Marooc mu gikombe cy'isi cya 2022 bikabatera ipfunwe, byiyongera ku kuba bataritwaye neza muri Euro ya 2020 ndetse na UEFA Nations Leagues.



Umugoroba wo ku ya 6 Ukuboza 2022 washaririye abanya-Espagne muri rusange, nyuma yo gutsindirwa na Marooc mu mukino wa 1/8 cy'igikombe cy'isi kiri kubera muri Qatar, benshi bijundika umutoza Luis Enrique Martinez.

Bijya gutangira, Luiz Enrique yagiye muri Qatar asize myugariro, Sergio Ramos wa Paris Saint Germain ndetse n'umunyezamu David De Gea wa Manchester United, ntibyakirwa neza n'abanyagihugu bamwe na bamwe bamushinje kwirengagiza abakinnyi bakomeye.

Mu mikino y'amatsinda, Espagne yabanje kunyagira Costa Rica ibitego 7-0, benshi bakeka ko ikomeye, ariko yakurikijeho kunganya n' U Budage (1-1) no gutsindwa n'u Buyapani ibitego 2-1, batangira kubona ko ari ikipe isanzwe nubwo yari mu zihabwa amahirwe yo kugera kure.

Muri 1/8, Luiz Enrique n'abasore be baje kuri Stade ya Education City bafite icyizere cyo kugera muri 1/4, ariko iminota 45 y'igice cya mbere yarangiye batangiye kubona ko icyo cyizere gishobora kuba ikiraza amasinde bagasezererwa.

Ikipe y'igihugu ya Marooc ifite benshi banyuze muri Espagne nka Achraf Hakimi, Amrabat, Hadadi n'abandi, yakinnye nta gitutu ndetse nta n'ubwoba, isoza iminota 90' ndetse na 30 ya 'Extra time' itinjijwe igitego, nyuma itsindira Espagne kuri Penaliti 3-0.

Luiz Enrique agerageza gukomeza abakinnyi be nyuma yo kurabywa ivu na Marooc

Abantu bari bijunditse Luiz Enrique kubwo kudahamagara Sergio Ramos na David De Gea, bahise bamusaba kwegura, ariko asubiza ko icyifuzo cye ari ugukomeza gukorera ikipe y'igihugu mu gihe ubuyobozi bwaba bubishaka.

Mu masaha y'igicamunsi cyo kuri uyu wa Kane, ishyirahamwe ry'umupira w'amaguru muri Espagne (RFEF) ryashimiye Luiz Enrique mu butumwa bwo kuri Twitter, hanemezwa ko atakiri umutoza w'ikipe y'igihugu.

Ubutumwa bwo gushimira no gusezerera Luiz Enrique

Mu itangazo Enrique yagenewe na José Francisco Molina ndetse na Luis Rubiales bayobora iri shyirahamwe, bamumenyesheje gusa ko bashaka kubaka imikinire y'ikipe y'igihugu bushya, bashima ko mu by'ingenzi yakoze, yahaye umwanya abakiri bato.

Luis Enrique Martínez w'imyaka 52 y'amavuko, yirukanywe mu gihe yari amaze imyaka 4 atoza ikipe y'igihugu 'La Furia Roja' aho yari yarageze muri 2018, nyuma yo gutandukana na FC Barcelona nayo atahaye umusaruro mwiza.

Enrique akuwe kuri uyu mwanya, we agishaka gutoza ikipe y'igihugu, ariko biragoranye gusobanura impamvu zatuma agumana umwanya kuko mu gihe amaze atoza yagize umusaruro udashimishije.

Enrique yirukanwe mu masaha 24 bakigaruka muri Espagne

Mu gikombe cy'isi cya 2018 cyabereye mu Burusiya, Espagne yatangiriye mu itsinda 'B' ndetse isoza iriyoboye ariko ihita isezererwa muri 1/8 nabwo kuri penaliti 4-3 yatsinzwe n'u Burusiya, nyuma y'aho bari banganyije 1-1 mu minota 120.

Mu mwaka wakurikiyeho, habaye irushanwa rya UEFA Nations League bwa mbere, ryegukanwa na Portugal naho Espagne ibura mu makipe 4 yitwaye neza, icyakora mu mwaka wakurikiyeho yikubita agashyi isorezwa ku mwanya wa kabiri, nyuma y' u Bufaransa.

Muri Euro 2022, Espagne yanyuze ku makipe ya Croatia n'u Busuwisi iyasezerera bisabye iminota 120, ariko nayo igeze muri 1/2 isezererwa kuri Penaliti 4-2 n'u Butaliyani ari nabwo bwaje kwegukana igikombe butsindiye u Bwongereza ku mukino wa nyuma.

Umusaruro nkene w'ikipe y'igihugu ya Espagne ubwo yatozwaga na Luiz Enrique, wegeranijwe no kuba yarirengagije abakinnyi bakomeye mu gikombe cy'isi ndetse no kuba yarasezerewe n'ikipe yo muri Africa, bituma ahirikwa ku mwanya yari agifitiye inyota.


Bye Bye, Enrique!






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND