Igikombe cy'isi: Morocco yayoboye itsinda ikubita Canada, u Bubiligi butaha amaramasa

Mu mikino ya nyuma yo mu itsinda F yabaye saa kumi n'imwe, ikipe y'igihugu ya Morocco yatsinze  ikipe y'igihugu ya Canada, naho ikipe y'igihugu ya Croatia inganya n'ikipe y'igihugu y'u Bubiligi.

Abakinnyi 11 ba Morocco babanje mu kibuga: Bono; Hakimi, Saïss, Aguerd, Mazraoui; Amrabat, Ounahi, Sabiri; Boufal, En-Neysri na Ziyech 

Mu mukino wakiniwe kuri Al Thumama stadium,  ikipe y'igihugu ya Morocco niyo yinjiye mu mukino mbere maze ku munota wa 3 umunyezamu wa Canada akora amakosa yihera umupira Hakim Ziyech ahita amuroba aterekamo igitego cya mbere cya Morocco.

Ikipe y'igihugu ya Canada nayo ku munota wa 14 yagerageje uburyo bw'igitego izamukana umupira yirukanka ariko Buchanan ananirwa kuwushyira mu izamu neza unyura ku ruhande. 

Abakinnyi 11 ba Canada babanje mu kibuga : Borjan; Johnston, Adekugbe, Miller, Vitoria, Hoilett; Buchanan, Kaye, Larin, Davies na Osorio.

Mu minota 15 Morocco ni yo yari iri imbere mu guhanahana ndetse no kwiharira umupira ifite 70%. Ku munota wa 23 Achraf Hakimi yazamukanye umupira ageze mu kibuga hagati ahereza umupira muremure Youssefu En-Nesyri ahita atsinda igitego kiza cya 2 cya Morocco. 

Ikipe y'igihugu ya Canada yakomeje kubura umupira, Morocco nayo ikomeza kurata ibitego byabazwe harimo n'icyo barase ku munota wa 33 ku mupira mwiza wari uhinduwe na Achraf Hakimi ariko Abdelhamid arekura ishoti riremereye abakinnyi ba Canada barikuraho. 

Ku munota wa 41, Nayef Aguerd wa Morocco yitsinze igitego bihita bigarura Canada mu mukino ndetse itangira no kwataka. Morocco nyuma yo kwitsinda igitego, yongeye kwataka cyane maze ku munota wa 3 w'inyongera Youssefu En-Nesyri yongera gutsinda igitego baracyanga kubera ko yari yaraririye. Igice cya mbere cyarangiye Morocco ariyo iyoboye umukino n'ibitego 2 kuri 1.

Igice cya kabiri cyatangiranye no gushaka igitego cyo kwishyura ku ruhande rwa Canada ariko bakomeza kwirangaraho bahusha uburyo bwinshi. Mu minota 64 umukino wari uri gukinirwa mu kibuga hagati nta kipe igera imbere y'izamu ry'indi. 

Canada yakomeje kwataka ishaka igitego cya 2 ariko umusifuzi akabasifura kurarira. Ku munota wa 77 Alistair Johston yateye umupira akoresheje umutwe ariko umupira uragenda ugwa mu murongo hagati mu izamu,  Canada yongera kurata ikindi gitego.

Umukino warangiye Canada igerageza gushaka igitego ariko biranga bituma iva mu mikino y'igikombe cy'isi itabonye inota na rimwe ndetse ifite n'umwenda w'ibitego 5.

Mu wundi mukino nawo wo muri iri tsinda rya F, ikipe y'igihugu ya Croatia yanganyije n'ikipe y'igihugu y'u Bubiligi. Ikipe y'igihugu ya Morocco niyo yazamutse iyoboye itsinde ikurikirwa na Croatia, u Bubiligi na Canada zo zatashye amaramasa.

Uko amakipe arangije ahagaze mu itsinda 

Morocco ifite amanota 7

Croatia ifite amanota 5

U Bubiligi bufite amanota 4

Canada ntanota narimwe ifite