KCCA yatandukanye n'abakinnyi 8 barimo Davis Kasirye wakiniye Rayon Sports na Kaddu wanyuze muri RS Berkane

Ku mugoroba wo kuri uyu wa Gatatu, ni bwo KCCA yatangaje ko itandukanye na; Gift Ali, Davis Kasirye, Patrick Kaddu, Innocent Wafula, Joseph Bukenya, Yasser Mugerwa, Erissa Ssekisambu na Samssn Kigozi.

Gift Ali, umwe mu bakinnyi basezerewe, yinjiye muri KCCA muri 2018, aho yari umwe mu bakinnyi bamaze igihe kinini bari muri 'Kasasiro Boys'. Gift yagiye azongwa n'imvune mu bihe bitandukanye, kugeza iyi kipe imusezereye.

Gift Ali

Joseph Bukenya na we ni umwe mu basezerewe na KCCA, ikipe yakuriyemo ndetse akiga mu ishuri ryayo rya ruhago, mbere yo gusinya amasezerano y’umwuga muri 2019. Iyi kipe yatangaje ko itazongerera amasezerano Joseph Bukenya.

KCCA kandi yemeje ko yarekuye myugariro Erisa Ssekisambu wageze muri KCCA muri 2019, cyo kimwe na rutahizamu Patrick Henry Kaddu wakiniye RS Berkane yo muri Marooc muri 2019 mbere yo gukinira Ismaily SC yo mu Misiri, aho atahiriwe. Yari amaze imyaka 2 muri KCCA ariko naho nta musaruro ugaragara yatanze.

Kaddu (imbere) yishimira igitego

Hari kandi Yasser Mugerwa wigeze guca muri Orlando Pirates ntaryoherwe n'ibihe, Innocent Wafula waciye muri Gor Mahia na Vipers ndetse na Andrew Kigozi wageze muri KCCA avuye muri Police FC (Uganda) muri 2020.

Rutahizamu Davis Kasirye wigeze gukinira Rayon Sports, na we ntabwo yarebewe izuba na KCCA, kuko yashyizwe ku rutonde rw'abakinnyi basezerewe, nubwo ari we mukinnyi watsindiye KCCA ibitego byinshi (7) muri 2022.

Davis yazamukiye muri URA FC mbere yo gusinyira Rayon Sports muri 2015, aho yigaragaje neza, agahita abengukwa na DCMP yo muri DRCongo mbere ya Zesco United yo muri Zambia, aho yavuye asubira gukina muri Uganda.

Davis Kasirye

Aba bakinnyi biganjemo ab'amazina akomeye ndetse barimo 5 bazanywe n'umutoza uhari, Morley Byekwaso, basezerewe ahanini bivuye ku musaruro mubi iyi kipe yagize, aho abayiyobora batanejejwe n'uko Vipers SC yatwaye igikombe ifite amanota 74 mu gihe KCCA yo yari ifite 56 gusa.