Umusirikare w'u Burusiya w'imyaka 21 yemeye ko yishe umusivile udafite intwaro, mu rubanza rwa mbere ku byaha by'intambara kuva itangiye muri Ukraine.
Vadim
Shishimarin yemeye ko yarashe umugabo w'imyaka 62, nyuma y'iminsi micye ibitero
by'u Burusiya muri Ukraine bitangiye. Ibi nibimuhama ashobora gukatirwa
gufungwa burundu. Iyi mfungwa yazanywe mu cyumba gitoya cy'urukiko i
Kyiv yambaye amapingu, kandi irinzwe bikomeye. Yasaga n'ufite igihunga, kandi
kenshi akaba yubitse umutwe.
Kateryna,
umupfakazi w'umugabo wishwe yari yicaye muri metero nkeya hafi y'uyu uregwa. Yihanaguye amarira ubwo uyu musirikare yari
yinjijwe mu rukiko, maze aricara akurikirana umushinjacyaha avuga uko umugabo
we Oleksandr Shelipov, yarashwe mu mutwe. Umucamanza yabajije Vadim niba yemera
ibyo ashinjwa abyemera atazuyaje. Ati "Uremera ibyo uregwa?", undi
arasubiza ati "Yego". "Byose?", Vadim nanone avuga buhoro
ati: "Yego".
Abashinjacyaha bavuga ko Vadim
yayoboraga 'unit' y'igifaru ubwo urukurikirane rw'imodoka zabo zaterwaga. We
n'abandi basirikare bane bibye imodoka maze berekeza hafi y'ahitwa Chupakhivka
mu burasirazuba, bahuye na Oleksandr ari kw'igare, nk'uko abashinjacyaha
babivuze. Bavuze ko kandi Vadim yategetswe kumwica, agakoresha Kalashnikov mu
kubikora.
Rurasubukurwa none kuwa kane mu cyumba
kinini cy'urukiko.
Kateryna
yabwiye BBC dukesha iyi nkuru uko
yabashije kwihangana mu rukiko agakurikira. Ati "Numvise mugiriye [Vadim]
impuhwe. Ariko icyaha nka kiriya ntabwo namubabarira."
Ukraine ivuga ko yanditse ibikorwa
birenga 10,000 bishobora kuba ibyaha by'intambara, byakozwe n'ingabo
z'Uburusiya. Umushinjacyaha mukuru wa Ukraine, Iryna Venediktova yanditse kuri
Twitter ati "Kuri uru rubanza rwa mbere, turatanga ubutumwa ko buri
munyabyaha wese, buri muntu wategetse cyangwa warebereye ibyaha muri Ukraine
ntaho azabihungira. "Moscow ihakana ko abasirikare bayo bibasiye abasivile,
ariko abakora iperereza bamaze igihe bakusanya ibimenyetso by'ibyo bita ibyaha
by'intambara, ngo bazabishyikirize urukiko mpuzamahanga mpanabyaha (ICC).
ICC yohereje abantu 42 b'inzobere mu iperereza, gufasha abakozi ba Ukraine mu kugenza ibyo byaha. Uburusiya nabwo byitezwe ko bushobora kuzaburanisha bamwe mu mfungwa z'intambara bufite bubarega ibyaha by'iterabwoba.
TANGA IGITECYEREZO