RFL
Kigali

APR FC vs Kiyovu Sport: Ibyo wamenya ku mukino w’imbaturamugabo w’amakipe ahataniye igikombe cya shampiyona

Yanditswe na: SAFARI Garcon
Taliki:14/05/2022 13:50
0


Kuri uyu wa Gatandatu tariki ya 14 Gicurasi 2022, Saa Cyenda kuri Stade ya Kigali harabera umukino w’umunsi wa 27 wa shampiyona uhuza APR FC na Kiyovu Sport ushobora guca impaka ku ikipe izegukana igikombe cy’uyu mwaka cyangwa ukongera imibare n’amahirwe kuri Kiyovu Sport iheruka igikombe mu myaka 29 ishize.



Uyu mukino ugiye guhuza amakipe akurikirana ku rutonde rwa shampiyona, aho APR FC iri ku mwanya wa mbere n’amanota 60, Kiyovu Sports ikaba iya kabiri n’amanota 57, ikipe yakora ikosa kuri uyu mukino bishobora kuyigiraho ingaruka ku gikombe cya shampiyona cy’uyu mwaka.

APR FC nitsinda uyu mukino irarusha Kiyovu Sport amanota 6 ndetse uretse iminsi yaba isigaye uwashaka yavuga ko yegukanye igikombe cya gatatu kikurikiranya cya shampiyona, gusa gutsinda kwa Kiyovu Sport biratuma inganya amanota na APR FC basigare babara imikino isigaye, birumvikana ko byayigarura byeruye muri kuruse y’igikombe.

Kiyovu Sport iheruka gukura amanota atatu kuri APR FC tariki ya 27 Ukwakira 2017, ndetse haba nyuma yahoo na mbere yahoo nta musaruro mwiza iyi kipe yagize kuri APR FC, ese kuri iyi nshuro bahanganiye igikombe ishobora kubikora?

Kuva mu 2016 APR FC na Kiyovu Sports bamaze guhura inshuro 15, APR FC yatsinzemo imikino umunani (8), Kiyovu Sports itsinda umwe (1) amakipe yombi anganya imikino itandatu (6).

Muri iyi mikino 15 kuva mu 2016, habonetsemo ibitego 13 ku mpande zombi aho APR FC ariyo ifitemo byinshi kuko yatsinze 12 mu gihe Kiyovu Sports yatsinze igitego kimwe (1), iheruka kwinjiza mu izamu rya APR FC ubwo yanayitsindaga 1-0 tariki ya 27 Ukwakira 2017.

Mu mikino 8 APR FC yatsinze Kiyovu guhera mu 2016, yayitsindaga itinjijwe, bivuze ko yayitsindaga kuri 0, ndetse n’umukino Kiyovu yatsinze APR FC mu 2017, nayo yayitsinze kuri 0.

Umukino uheruka guhuza APR FC na Kiyovu Sports amakipe yombi yanganyije 0-0, kuva mu 2016 mu mikino 15 yahuje amakipe yombi, imikino itandatu (6) banganyije yose byari 0-0.

Mu mikino itanu APR FC iheruka gukina muri shampiyona uyu mwaka, yose yarayitsinze yinjizamo ibitego icyenda (9), yinjizwa bitatu (3), mu gihe Kiyovu Sports yatsinzemo itatu (3) inganya umwe (1) itsindwa umwe (1), muri iyo mikino yatsinzemo ibitego birindwi (7) yinjizwa bibiri (2).

Umukino wa kamarampaka hagati ya APR FC na Kiyovu Sport





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND