Kuri uyu wa Gatandatu tariki ya 14 Gicurasi 2022, nibwo bamwe mu banyamakuru bakoranaga na Bagirishya Jean de Dieu uzwi nka Jado Castar banditse ku mbuga nkoranyambaga zabo bavuga ko yafunguwe ndetse bamuha ikaze mu buzima bushya yari amaze amezi 8 atabona.
Abanyamakuru
barimo David Bayingana, Imfurayacu Jean Luc, Sam Karenzi n’abandi bahaye ikaze
mugenzi wabo, Jado Castar wari umaze amezi 8 afunze azira icyaha cyo gukoresha
inyandiko mpimbano zatumye u Rwanda rusezererwa mu irushanwa ry’igikombe cya
Afurika mu bagore cyabereye mu Rwanda.
Anyuze
ku rukuta rwa Twitter, David Bayingana yagize ati:
Tariki
ya 13 Ukwakira 2021, nibwo Urukiko Rwisumbuye rwa Gasabo rwakatiye Jado Castar
igifungo cy’imyaka 2 rumuhamije icyaha cyo gukoresha inyandiko mpimbano.
Ku
wa Mbere tariki ya 7 Werurwe 2022, nibwo hatangajwe umwanzuro wo kugabanyiriza
igihano Jado Castar nyuma yo kujuririra umwanzuro w’Urukiko Rwisumbuye rwa
Gasabo rwamukatiye igifungo cy’imyaka 2 nyuma yo guhamwa n’icyaha cyo gukoresha
inyandiko mpimbano zatumye u Rwanda rusezererwa mu irushanwa ry’igikombe cya
Afurika mu bagore cyabereye mu Rwanda.
Castar
yahanishijwe gufungwa amezi 8 aho kuba amezi 24, uhereye igihe yagiriye mu
buroko n'igihe yakatiwe gufungwa.
Castar
usanzwe uzwi cyane mu itangazamakuru no mu mukino wa Volleyball, yiyemereye
icyaha cyo gukoresha inyandiko mpimbano byatumye ikipe y’igihugu y’Abagore muri
Volleyball isezererwa mu gikombe cya Afurika yari yakiriye izira gukinisha
abakinnyi bakomoka muri Brazil mu buryo butemewe.
Uyu
mugabo watoje ikipe ya Kirehe Volleyball Club yatawe muri yombi tariki ya 20
Nzeri 2021 aho yari akurikiranyweho gukoresha inyandiko mpimbano mu gushyira mu
bikorwa inshingano ze.
Ibi
byaha byaje nyuma y’aho ikipe y’Igihugu y’u Rwanda y’Abagore yasezerewe mu
Gikombe cya Afurika cya Volleyball cyabereye i Kigali hagati ya tariki ya 10
n’iya 20 Nzeri 2021, ishinjwa gukinisha abakinnyi bakomoka muri Brazil batujuje
ibisabwa.
Abo
bakinnyi barimo Aline Siqueira, Apolinario Caroline Taiana, Mariana Da Silva na
Moreira Bianca Gomes bakomoka muri Brazil, bakiniye u Rwanda ku nshuro ya mbere
nyuma yo kugera i Kigali muri Kanama uyu mwaka, ariko ibyangombwa byabo byabaye
ikibazo bituma u Rwanda rusezererwa mu gikombe cya Afurika.
Jado
Castar asanzwe ari umunyamakuru wa siporo mu Rwanda, akaba n’Umuyobozi wa Radio
B&B Umwezi FM. Yanabaye umutoza mu makipe atandukanye ya Volleyball mu
Rwanda.
TANGA IGITECYEREZO