RFL
Kigali

Covid-19: Ubwoko bushya buzwi nka B.1.1.529 bwakangaranyije Isi, u Rwanda, Amerika na UK bashyiraho ingamba zo kwirinda

Yanditswe na: Mupende Gedeon Ndayishimiye
Taliki:26/11/2021 21:44
0


Nyuma y'uko habonetse urukingo rwa Covid-19 benshi bakikingiza, abatuye Isi bari bizeye kwinjira mu buzima busanzwe nyuma y'imyaka ibiri bamaze bugarijwe na Covid-19, ariko birasa nk'ibiri guhindura isura kuko muri Afrika y'Epfo hagaragaye ubwoko bushya bwa Koronavirus yihinduranyije, bukaba buhangayikishije cyane amahanga.



Nk'uko tubicyesha Ishami ry'Umuryango w'Abibumbye ryita ku buzima, WHO/OMS mu nyandiko ryashyize hanze kuri uyu wa Gatanu, ubwoko bushya bwa Koronavirus yihinduranyije bwahawe izina rya B.1.1.529 bwagaragaye bwa mbere muri Afrika y'Epfo tariki 24 Ugushyingo 2021. Umuntu wasanzwemo ubu bwoko bushya, bari bamufatiye ibizamini tariki 9/11/2021. 

WHO ivuga ko ubu bwoko bushya bukwirakwira cyane kurusha ubundi bwose bwa Covid-19. Yatangaje kandi ko mu byumweru bicye bishize muri iki gihugu haragaraye ukwiyongera k'ubwandu bwa Covid-19. Ubu bwandu bumaze kugera mu bihugu binyuranye birimo; Afrika y'Epfo, Botswana, Ububiligi, Israel n'u Bushinwa (Hong Kong).

Minisiteri y'Ubuzima mu Rwanda (MINISANTE) yatanze itangazo rivuga ko yasubijeho gahunda yo gushyira mu kato abinjira mu gihugu. Yagize iti "Nyuma y’uko mu bihugu bya Afurika y’Amajyepfo hagaragaye ubwoko bushya bwa COVID19 bufite ubukana, Minisiteri y’Ubuzima yasubijeho gahunda yo gushyira abantu bose binjiye mu Rwanda mu kato k’amasaha 24 muri hoteli zabugenewe guhera ku tariki ya 28/11/2021 saa sita z’amanywa". Ni itangazo iyi Minisiteri yashyize hanze ku mugoroba w'uyu wa Gatanu tariki 26/11/2021.

Iri tangazo rije rikurikira ubutumwa bwa Dr Sabin Nsanzimana Umuyobozi Mukuru w'Ikigo cy'Igihugu gishinzwe Ubuzima (RBC) bugira buti "Ubwoko bushya bwa Koronavirus yihinduranyije cyane bwatangiye kugaragara mu Majyepfo ya Afrika buzwi nka B.1.1.529 , bushobora kuba bwandura cyane kurusha Delta". Yibukije abanyarwanda uburyo bwo kwirinda Koronavirus avugamo kwikingiza, kwambara neza agapfukamunwa, kwipimisha,...

Si u Rwanda gusa rwahagurukiye kwirinda ikwirakwira ry'ubwandu bushya bwa Koronavirus bwakomotse muri Afrika y'Epfo, kuko n'ibihugu bigize Umuryango w'Ubumwe bw'Uburayi byashyizeho ingamba zikarishye bikumira ingendo zituruka muri Afrika y'Epfo n'ahandi muri Afrika havugwa ubu bwoko bushya. 

U Bwongereza bwakumiriye ibihugu 6 byo muri Afrika bubibuza kwinjira muri iki gihugu. Nk'uko bitangazwa na CNN, ibyo bihugu ni: Afrika y'Epfo, Namibia, Lesotho, Botswana, Eswatini na Zimbabwe. Abongereza batuye/babarizwa muri ibyo bihugu bashaka gutaha iwabo mu Bwongereza, guhera kuri uyu wa Gatanu bazajya bashyirwa mu kato k'iminsi 10.

Leta Zunze Ubumwe za Amerika nayo yakumiriye ingendo ziva muri Afrika y'Epfo no mu bindi bihugu 7 bya Afrika aribyo:  Botswana, Zimbabwe, Namibia, Lesotho, Eswatini, Mozambique na Malawi. Kuva kuwa Mbere tariki 28 Ugushyingo, abanyamerika batuye muri Afrika y'Epfo no muri ibyo bihugu bindi, bazemererwa gusubira iwabo muri Amerika mu kubarinda kwandura ubu bwoko bushya bwa Koronavirus buteye ubwoba.


Itangazo rya Minisiteri y'Ubuzima ryo kuri uyu wa Gatanu






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND