“Imana impaye umugabo umeze nka Mbonyi najya nyishima” Betty wakoze indirimbo kuri uyu muhanzi yahishuye uko yamuhamagaye agahinda umushyitsi-VIDEO

Mu kiganiro kihariye Uwimana Beatrice (Ganza Betty) yagiranye na InyaRwanda TV yavuze ko ari umufana ukomeye wa Israel Mbonyi kuva kera. Akunda indirimbo ze nk’iyitwa 'Ku migezi' n’izindi. Mu gusobanura icyatumye akora indirimbo yise 'Israel Mbonyi', yavuze ko byose byatewe no gukunda ibihangano bye byamufashije mu buzima bushaririye yanyuzemo kuva akiri muto ku buryo ngo yazumvaga akabohoka.

Betty yavuze ko yasabye Imana kuzakora umuziki akamenyekana

Iyi ndirimbo yagiye hanze kuri uyu wa Kabiri tariki 30 Werurwe 2021, yumvikanamo ubutumwa bwo gushima Imana yaremye Mbonyi n’ababyeyi bamwibarutse akerera imbuto Isi. Iyi nkumi itabinyuze ku ruhande yavuze ko Imana imuhaye umugabo umeze nka Mbonyi yayishimira igitangaza yaba ikoze. Yagize ati ”Eeeeeeeh najya nyishima ko yakoze imirimo n’ibitangaza hahaha. Nakumva ari ibintu byiza kuko kubona umugabo cyangwa umusore ukijijwe ni iby'agaciro burya”.

Betty Ganza ni umukobwa w'imyaka 23 y'amavuko utuye mu Murenge wa Kagarama, Akarere ka Kicukiro mu Mujyi wa Kigali. Afite indirimbo zinyuranye zirimo; Nabonye inshuti, Nyobora Mana mu nzira yawe, U Rwanda rwacu rurarinzwe, Nzagushima, Israel Mbonyi n'izindi. Uyu mukobwa utarahura na Mbonyi, yakomoje ku cyo yamusaba baramutse bahuye ati ”Namusaba nko kujya mu gitaramo cy'iwe. Mana we najya mu mwuka!”. Yakomeje avuga ko n’ubwo yakwicarana nawe byonyine yakumva ari ishema rikomeye kuri we.

Yahishuye ko indirimbo ye yageze kuri Mbonyi akamuhamagara agashya ubwoba

Betty Ganza yasabye Israel Mbonyi kumufasha kuzamura impano ye kuko nawe yumva ashaka kuririmba akazamuka, umuziki we ukagira ahantu uva n'aho ugera. Nyuma y'uko iyi ndirimbo yise “Israel Mbonyi” igiye hanze ngo yatunguwe no kubona Mbonyi amuhamagaye kuri telefone ubwoba buramwica ahinda umushyitsi.

Mu kubisobanura yagize ati ”Nimero ze nari naranditse ho Mbonyi! Hari nko mu ma saa 10:00 nari ndyamye mbona Mbonyi arampamagaye (akubita igitwenge)! Numva mfite ubwoba (arongera araseka), arambwira ati Ganza Betty bite?. Ambaza niba meze neza aranshimira ati 'nabonye indirimbo yawe yarasohotse abantu bari kuyinyoherereza barishimye cyane'”.

Yavuze ko yashima Imana abonye umugabo nka Mbonyi

Yakomeje avuga ko nawe yahise aboneraho kumubwira ko amukunda nk’umufana ari nayo mpamvu byamurenze agakora indirimbo ngo imushimishe, ishimishe n’abamwibarutse. Yangeyeho ko yamusabye ko bazahura akamubona amaso ku maso cyangwa akabona ababyeyi be kuko nabo atabazi hanyuma Mbonyi arabimwemerera. Ubu yiteguye kubipanga akajya guhura nawe icyakora yashimangiye ko afite amatsiko menshi yo kubona ababyeyi ba Mbonyi bamuhaye uburere budasanzwe.

Indirimbo 'Israel Mbonyi' ya Ganza Betty yakoreye MBONYI nk'impano yamugeneye yumvikanamo aya magambo: "Israel Mbonyi mukozi w'Imana, wakoze indirimbo nziza zifasha abantu, si ukukurata ibyo wakoze biragaragara, abakuru n'abato bose barabihamya. Ndagushima Mana wowe utanga impano nzima ugatanga n'uburyo bwo kuzikoresha".

Ati "Njye ndashimira umubyeyi wakubyaye, yagutwite amezi 9 yose arashira, Imana yamurindiye intambwe z'ibirenge byose, umubyeyi ni urukundo, arigengesera amezi 9 yose agashira, umubyeyi ni urukundo. Yemwe babyeyi bacu dukunda, mwigishe abana banyu gukunda Imana,..ejo bazavamo Israel Mbonyi mushya". Israel Mbonyi aherutse kubwira INYARWANDA ko iyi ndirimbo nshya ya Ganza Betty yayumvise asanga irimo amashimwe ku Mana. Yasabiye umugisha uyu muhanzikazi ku bw'iki gikorwa yakoze.

Betty Ganza umufana ukomeye wa Israel Mbonyi

Israel Mbonyi akomeje gushimirwa na benshi barimo na Ganza Betty ku bwo gukora ibihangano bihembura imitima ya benshi

INKURU WASOMA: Niwe mu star nahisemo! Betty yakoze indirimbo yise Israel Mbonyi mu gushimira Imana n'ababyeyi ba Mbonyi isamirwa hejuru n'ibyamamare-YUMVE

REBA HANO IKIGANIRO KIRYOSHYE TWAGIRANYE NA GANZA BETT

REBA HANO INDIRIMBO ISRAEL MBONYI YA GANZA BETTY

VIDEO: Patrick Promotor - InyaRwanda Tv