Ahabanza Imyidagaduro

Nta buryohe bw'Isi itarimo umugore: Danny Country yakoze mu nganzo yerekana agaciro k'umugore ku munsi nk'uyu Isi yose ibazirikana-VIDEO

Yanditswe na: Mupende Gedeon Ndayishimiye
Taliki:8/03/2021 10:23 0

Buri mwaka tariki 08 Werurwe, Isi yoze yizihiza Umunsi Mpuzamahanga w'Abagore, hakazirikanwa agaciro kabo mu buzima bwa buri munsi bw'abatuye Isi. Muri uyu mwaka, uyu munsi urizihizwa kuri uyu wa Mbere, akaba ari muri urwo rwego umuhanzi w'umunyempano Danny Country yakoze mu nganzo akifatanya n'Isi yose mu kwizihiza uyu munsi.

UMVA KU INYARWANDA MUSIC INDIRIMBO 'UMUGORE' YA DANNY COUNTRY

Kuri uyu Munsi Mpuzamahanga w'Abagore, umuhanzi Ntigurirwa Danny (Danny Country) ukora injyana ya Country yashyize hanze indirimbo nshya yise 'Umugore' nk'impano yageneye abantu bose ku munsi nk'uyu. Ni indirimbo yakoze mu rwego rwo kwerekana agaciro k'umugore. Ati "Indirimbo 'Umugore' nayikoze cyangwa nayanditse mu buryo bwo kwizihiza umunsi w'umugore uba ku wa 08/03".

"Aho umugore abuze wumva nta buzima" Danny Country mu ndirimbo ye 'Umugore'

Danny Country yabwiye InyaRwanda.com impamvu yakoze iyi ndirimbo, ati "Nashatse kwerekana agaciro k'umugore muri rusange. Imana irema umuntu yabonye afite irungu imuha Umugore nk'igisubizo. Ikindi twese kugira ngo tugere ku Isi, inzira ducamo ni umugore. Kuyikora si ukwaka agaciro abagabo, ahubwo ni agaciro abagabo duha Umugore (mama) utubyara, umugore (umufasha), utubyarira, umugore (mushiki) tuvukana. Mbifurije umunsi mwiza w'Umugore. Imana ibahire muri byose".

Mu ndirimbo 'Umugore' yasohokanye n'amashusho yayo, Danny Country aririmbamo aya magambo avuga ibigwi umugore nk'aho aririmba ko nta buryohe bw'Isi itarimo umugore. Ati: "Imana yaremye Isi n'ibiyuzuye byose, irema umuntu ngo abitware, yitegereje ibona Isi yuzuye irungu, ibona igisubizo nta kindi ari umugore. Umugore mwiza mbona ari Umutima w'iyi si, kuko aho abuze rwose wumva nta buzima, umugore mwiza mbona ari umunyu w'iyi si, nta buryohe bw'isi itarimo umugore".

Danny Country yafashe gitari ye avuga ibigwi Abari n'Abategarugori

Danny Country yahashye ubumenyi mu Ishuri rya muzika ku Nyundo mu 2016 aho yakurikiranye ibijyanye n'amajwi (Vocal). Avuga ko gukora umuziki waranawize byoroshya akazi k'ubuhanzi. Urugendo rwe nk'umuhanzi ku giti cye, rwatangiriye ku ndirimbo yitwa 'Mama', akaba yarayishyize hanze tariki 31/08/2020. Nyuma yayo yakoze izindi ndirimbo zitandukanye zirimo 'Nahisemo', 'One day at time (Cover)' yakoranye na Sam Rwibasira n'iyi nshya yise 'Umugore' yamaze gushyira hanze.