Minisiteri ya Siporo mu Rwanda yamaze impungenge abakunzi ba ruhago bibazaga niba shampiyona yasubitswe izasubukurwa cyangwa umwaka uzaba impfabusa ukaburizwamo, itangaza ko mu byumweru bibiri cyangwa bitatu bongera kubona amakipe bakunda aseruka mu kibuga.
Shampiyona y'icyiciro cya mbere yasubitswe mu Ukuboza igeze ku munsi wa gatatu w'imikino, nyuma yuko ubwandu bwa COVID-19 bwari bwamaze kwinjira mu makipe atandukanye.
Ni mu kiganiro cya Siporo cya RTV, Minisitiri wa Siporo, Madame Munyangaju Aurore Mimosa yavuze ko mu byumweru bibiri cyangwa bitatu shampiyona y’umupira w’amaguru izaba isubukuwe.
Yagize ati "Twaraganiriye na Federasiyo zose kugira ngo twumve aho bagejeje gahunda yo gushyira hamwe amabwiriza yo kwirinda COVID-19 kuko habayeho guteshuka, abantu ntibubahirize amabwiriza ya COVID".
“Twumvikana y’uko bagiye kubinoza, tugafatanyiriza hamwe tukabinoza ku buryo, sinavuga ngo mu byumweru bibiri ariko birashoboka ko no mu byumweru bibiri cyangwa bitatu Shampiyona ishobora kongera igasubukurwa”.
Bivuze ko muri Werurwe 2021, amakipe azagaruka mu kibuga akina umunsi wa kane w'imikino nubwo hari ayari amaze gukina umukino umwe gusa arimo Rayon Sports na APR FC.
Ibi bisobanuye ko mu minsi ya vuba amakipe ahabwa uburenganzira bwo gusubukura imyitozo kugira ngo yitegure isubukurwa rya shampiyona ariko amabwiriza yo kwirinda COVID-19 yubahirizwa.
Eng
RSS 
TANGA IGITECYEREZO