Umugore wa Perezida wa Zimbabwe yiyemeje kumara iminsi 3 atarya mu gusengera Coronavirus

Auxillia Mnangagwa umugore wa Emmerson Mnangagwa Perezida wa Zimbabwe, yavuze ko aya masengesho yo gusengera Covid-19 n'izindi mpfu zifitanye isano nayo, yayatangiye uyu munsi kuwa Kane tariki 21 Mutarama 2021, akazayasoza kuwa Gatandatu tariki 23 Mutarama 2021. Yasabye abagore bose kwifatanya nawe.

Yagize ati "Nk'umubyeyi w'igihugu, munyemerere nsabe abagore bose bo muri Zimbabwe n'abo mu bindi bihugu babyifuza, kwifatanya nanjye mu masengesho yo kwiyiriza ubusa dutakambira Uwiteka Imana kuva kuri uyu wa 21 Mutarama 2021, dusengere igihugu cyacu kive muri ibi bihe y'akababaro".

Nk'uko tubikesha ikinyamakuru Herald, Musenyeri Nehemiah Mutendi ukuriye ihuriro ry'amatorero yose akorera muri Zimbabwe, yasabye abanyamadini, abakristo bose n'abaturage ba Zimbabwe, kwifatanya na Nyakubahwa Auxillia Mnangagwa umugore wa Perezida w'igihugu cyabo mu masengesho yatangiye. 

Kuva icyorezo cya Covid-19 cyagera muri Zimbabwe, kimaze gutwara ubuzima bw'abaturage bagera kuri 879. Abanduye bose hamwe ni 29,408, abakize ni 19, 253. Ni mu gihe ku Isi hose abamaze kwandura iyi ndwara barenga miliyoni 96, abayikize barenga miliyoni 53.1 naho abamaze guhitanwa nayo bararenga miliyoni 2. 

Umugore wa Perezida wa Zimbabwe yiyemeje gusengera Covid-19