Batatu bari mu mwiherero w'ikipe y'igihugu Amavubi iri kwitegura irushanwa rya CHAN 2021, barimo abakinnyi babiri n'umwe mu bagize Staff bari mu kato nyuma y'uko ibipimo bya mbere bigaragaje ko banduye Coronavirus.
Ntabwo ubuyobozi bwa FERWAFA bushaka kugira icyo buvuga kuri aya makuru kuko bwavuze ko bugiye gutohoza neza bukamenya neza iby'aya makuru.
Gusa aba bakinnyi ndetse n'uyu mukozi w'ikipe y'igihugu basanzwemo COVID-19 nk'uko INYARWANDA ibikesha bamwe mu bari hafi y'ikipe y'igihugu, bari mu kato ntabwo bari gukorana imyitozo n'abandi bakinnyi.
Rutahizamu Sugira Ernest n'ubwo atarwaye Coronavirus, ntaremererwa gutangira imyitozo kimwe n'abandi kubera ko yitabiriye umwiherero nyuma y'abandi, biba ngombwa ko abanza kujya mu kato, akazasanga abandi mu myitozo nyuma yo gupimwa iki cyorezo.
Ubuyobozi bwa FERWAFA bwatangaje ko hari kurebwa uburyo hategurwa imikino ya gicuti mbere yo kujya muri Cameroun, iyi mikino ishobora kubera mu Rwanda cyangwa hanze yarwo.
Irushanwa rya CHAN 2021 rizatangira tariki ya 16 Mutarama 2021, rikazabera mu mijyi itandukanye y'igihugu cya Cmeroun.
Tariki ya 18 Mutarama 2021 ni bwo u Rwanda ruzakina umukino wa mbere na Uganda saa 20:00’ ku kibuga cyitwa "Stade de la Reunification Bepanda, ruzongera kugaruka mu kibuga tariki ya 22 Mutarama 2021 rukina na Maroc na bwo saa 17:00’ kuri Bepanda ni mu gihe umukino usoza itsinda Amavubi azacakirana na Togo tariki ya 26 Mutarama 2021 saa mbili ahitwa Limbe.
U Rwanda rumaze kwitabira CHAN inshuro enye gusa ntiruraryegukana na rimwe kuko kure rwageze ari muri 1/4 mu 2016, mu irushanwa rwari rwakiriye ariko rusezererwa na Repubulika Iharanira Demokarasi ya Congo yegukanye iki gikombe.
Amavubi akomeje imyitozo yitegura CHAN 2021
Eng
RSS 
TANGA IGITECYEREZO