Basketball: Ejo hazaza h’ikipe y’abatarengeje imyaka 18 hateguye gute?

Muri gahunda n’icyifuzo FERWABA yari ifite harimo kurushaho gutegura neza aba bakinnyi hagamijwe umusaruro bari kuvana mu mikino Nyafurika y’abari muri iki cyiciro (FIBAU18 Championship), imikino yabereye mu Rwanda kuva kuwa 22-31 Nyakanga 2016 igikombe kigatahanwa na Angolaitsinze Misiri ku mukino wa nyuma mu gihe u Rwanda rwegukanye umwanya wagatanu.

U18 mu mikino ya shampiyona yakinaga itegurirwa kwitabira imikino Nyafurika

Nyuma yo kuva muri iyi mikino hari abakomeje kwibaza niba iyi kipe izakomeza kuba muri shampiyona y’u Rwanda ariko kugeza ubu amakuru nyayo nuko iyi kipe itazakina muri shampiyona ahubwo izagaruka mu mwaka wa 2017 nk’uko Mutabazi Richard umunyamabanga mukuru wa FERWABA yabitangarije Inyarwanda.com

“U18 iba buri myaka ibiri, uyu mwaka (2016-2017) rero ntacyo yatumarira ahubwo mu 2017 tuzakina amarushanwa ya U16 (abatarengeje imyaka 16) kandi ntiwashyira umwana w’imyaka 15 muri shampiyona.Buriya U16 ya 2017 nimara gukina tuzahita dufatamo bamwe bazuzuza imyaka 17 mu 2018 bahite bakora U18”.

Mutabazi Richard umunyabanga mukuru mu ishyirahamwe ry'umukino wa Basketball mu Rwanda (FERWABA)

Kuba iyi kipe ya U18 yari isanzwe iba muri shampiyona, twashatse kumenya niba shampiyona izakomeza gukinwa n’amakipe icyenda (9) kuko yari igizwe n’amakipe icumi (10) avuga ko bishoboka ko yakinwa n’amakipe 10 cyo kimwe nuko yakwiyongera kuko hari amakipe ashobora kuzaza gusaba kuyinjiramo harimo n’ikipe ya BK.

“Ntayiriyandikisha (ikipe nshya).Dufite inama y’intekorusange tariki 23 Ukwakira 2016 buriya nibwo tuzamenya byose.Hari n’igihe wakumva imwe mu makipe dusanganwe isezeye cyangwa indi yinjiye.Nka BK na EUCL barabishaka ariko ntago birajya mu bikorwa”.

Gusa uyu mugabo akomeza avuga ko mu gihe inama y’intekorusange yarangira nta kipe irabisaba mu buryo bwmewe n’amategeko  byaba birangiye binavuga k shampiyona izakinwa n’amakipe icyenda (9).

Mu mikino 18 ya shampiyona U18 yakinnye, yatsinzemo ine (4) itsindwa 14.Ntiyigeze iterwa mpaga ahubwo yasoje shampiyona ifite amanota 22.

Yinjije amanota 887 ynjizwa amanota 1117 bituma igira ideni ry’amanota 230 ku mwanya wa 8 iryamyeho.Mu mikino Nyafurika iyi kipe yakinnye, irushanwa ryarangiye ikinnye imikino 7 itsindamo amanota 465 isozanya umwanya wa 5 mu makipe 11 yitabiriye irushanwa.

Mutokambali Moise umutoza w'ikipe y'igihugu mu mukino wa Basketball 

Abakinnyi bakinnye muri iyi kipe bamwe berecyeje muri Leta Zunze Ubumwe za Amerika aho bagiye bahabwa buruse zo kwiga banakina umukino wa Basketball ndetse abandi muri bo barimo nka Nshobozwabyosenumukiza Jean Jacques bari mu Rwanda dore ko uyu musore ari mu ikipe ya Espoir Basketball Club iri mu mikino y'akarere ka gatanu ikomeje kubera i Dar Es Slam muri Tanazania.