Mbonyi, Bosebabireba na Gahongayire mu byamamare byitabiriye igitaramo cy'amateka cya Bosco Nshuti - AMAFOTO

Iki gitaramo cyari kigamije kwizihiza imyaka 10 amaze mu muziki ku giti cye, ndetse anamurikamo Album ye ya kane yise “Ndahiriwe”. Yari amaze amezi atanu agitegura, avuga ko ari igice cy’uruhererekane rw’ibitaramo “byashibutse mu kumenya urukundo Imana imukunda.”

Iki gitaramo cyitabiriwe n’ibyamamare bikomeye mu muziki wa Gospel barimo Israel Mbonyi, Chryso Ndasingwa, Aline Gahongayire, Theo Bosebabireba, Prosper Nkomezi, Jesca Mucyowera, Alexis Dusabe, Danny Mutabazi, Gaby Kamanzi, Papi Clever na Dorcas, Jado Sinza wari uri kumwe na mushiki we, Jean Christian Irimbere, Arsene Tuyi, n’abandi benshi.

Mu bandi bitabiriye, harimo Bamporiki Edouard wahoze ari Umunyamabanga wa Leta muri Minisiteri y’Urubyiruko n’Umuco, Umunyamabanga Mukuru w’Ishyirahamwe ry’Uturere n’Umujyi wa Kigali (RALGA), Dominique Habimana, abanyamakuru ba RBA barimo Rugaju Reagan na Gloria Mukamabano umenyerewe mu makuru ya Televiziyo Rwanda;

Irene Murindahabi ureberera umuziki wa Vestine na Dorcas, Maurice Ndatabaye uyobora Power of the Cross ku rwego rw'isi, umunyarwenya Samu Zuby n’abandi. Hari kandi abashumba batandukanye bitabiriye barimo Bishop Prof Masengo n’umugore we [Pastor Solande Masengo], Madamu wa Rev Isaie Ndayizeye [Mushimiyimana Rachel], Prophet Ticien, n’abandi.

Bosco Nshuti yamuritse Album ya kane yise "Ndahiriwe", avuga ko yayise atyo kuko “kumva Yesu ari we soko y’amahirwe nyakuri” byamuhaye impinduka mu buzima. Iyi Album igizwe n’indirimbo 10, zirimo: Ndahiriwe, Ndatangaye, Jehovah, Ni muri Yesu n’izindi zirimo izafatanyije n’abahanzi nka Aime Uwimana, Ben & Chance, Tracy na Rene.

Uyu muramyi wamamaje Yesu i Burayi mu bitaramo yise "Europe Tour 2025" byabaye mu mezi macye ashize, yasobanuye ko yise igitaramo 'Unconditional Love' kubera ko kigaragaza urukundo Imana ifitiye abantu rutagira imipaka, atari urushingiye ku byo umuntu yakoze.  Ati: “Imana yadukunze tutaraba beza, nta kiguzi twatanze. Iyo ni yo ‘Unconditional Love’.”

Mu gusoza igitaramo, Bosco Nshuti yashimiye abantu bagize uruhare rukomeye mu rugendo rwe, abashyikiriza ibihembo (Awards) barimo Umugore we, Joshue Shimwa wamubonyemo impano bwa mbere, Producer Bruce wamukoreye indirimbo yambere ku buntu yitwa “Wuzuye ibambe, New Melody nka Group yazamukiyemo;

Chorale Siloam nka Chorale yakozemo umurimo igihe kinini, ababyeyi be, Mukuru we uba muri Leta Zunze Ubumwe za Amerika, Lt Col Simon Kabera, Pasiteri Emmanuel Senga wamufashije kujya gukorera ibitaramo i Burayi, ndetse n’Itorero rya ADEPR abarizwamo.

Bosco Nshuti yatangiye umuziki mu makorali ya Gikirisitu nka Silowamu ya ADEPR Kumukenke na New Melody. Mu 2015 ni bwo yatangiye kuririmba ku giti cye. Kugeza ubu afite Album enye, ari zo: Ibyo Ntunze, Umutima, Ni Muri Yesu ndetse na Ndahiriwe.

Iki gitaramo cyasize amateka, cyabaye intangiriro y’urundi rwego Bosco Nshuti agezeho mu murimo w’Imana abinyujije mu muziki. Cyari igitaramo cy’ishimwe, cy’ubutumwa bukora ku mutima, cyuzuyemo indirimbo ziri ku rwego mpuzamahanga, kandi kirashimangira ko Gospel nyarwanda ikomeje gutera imbere.

Itsinda ry'abaramyi bubashywe mu muziki, Ben & Chance bitabiriye igitaramo cya Bosco Nshuti ndetse bafatanya na we gutaramira abitabiriye bose

Israel Mbonyi umaze kubaka ibigwi ku rwego mpuzamahanga yitabiriye iki gitaramo

Aline Gahongayire ukubutse mu Bubiligi ntiyatahanzwe

Tonzi bakunze kwita 'Igifaru' yanyuzwe n'igitaramo cya Bosco Nshuti

Gabby Kamanzi yatahanye umutima ushima

Rugaju Reagan ukunzwe mu mikino na Sam Zuby bari baje kuramya Imana

Senga B ukorera umurimo w'Imana muri Canada na we yitabiriye igitaramo cya Bosco Nshuti

Umushumba Mukuru wa City Light Foursquare Church Rwanda, Bishop Prof. Dr. Fidèle Masengo ari kumwe n’umugore we bitabiriye igitaramo cya Bosco Nshuti

Jean Christian Irimbere yitabiriye igitaramo ndetse yasanganiye Bosco Nshuti ku rubyiniro barataramana

Rene na Tracy ni bo bayoboye igitaramo

Umunyabigwi Theo Bosebabireba yitabiriye igitaramo cy'amateka cya Bosco Nshuti

Jesca Mucyowera ari mu bihumbi by'abantu bitabiriye igitaramo 'Unconditional Love - Season 2' Bosco Nshuti yamurikiyemo Album ya kane

Bosco Nshuti yakoze igitaramo gikomeye cyahuriranye no kwizihiza isabukuru y'imyaka 10 amaze mu muziki