Hamaze igihe hari imirwano hagati y’igihugu cya Armenian na Azerbaijan,iyi mirwano ikaba ishingiye ahanini ku gupfa akarere ka Nagorno-Karabakh. Aka karere k'imisozi gafatwa nk'Azerbaijan, ariko kagenzurwa na Armenia kuva intambara yo mu mwaka wa 1994 yarangira.
Iyi mirwano yatangiye mu minsi ine ishize, ubu isa nk'iri kurenga ako karere ka Nagorno-Karabakh ijya n'ahandi. Nk'uko BBC dukesha iyi nkuru ibitangaza ivuga ko igihugu cya Armenia cyatangaje ko imwe mu ndege zayo z'intambara yahanuwe n'indege y'intambara ya Turukiya, mu kwiyongera gukomeye k'ubushyamirane mu mirwano ihuje Armenia n'Azerbaijan bipfa akarere ka Nagorno-Karabakh.
Minisiteri y'ububanyi n'amahanga y'Armenia yavuze ko
umupilote w'iyo ndege yo mu bwoko bwa SU-25 yakorewe mu cyari Leta Zunze Ubumwe
z'Abasoviyeti (Uburusiya bw'ubu), yapfuye amaze kuraswa n'indege ya Turukiya yo
mu bwoko bwa F-16, mu kirere cya Armenia.Gusa ariko nubwo ibi byatangajwe
igihugu cya Turukiya cyahakanye ibyo bivugwa n'Armenia.
Abantu hafi 100, barimo n'abaturage b'abasivile, ni bo
bamaze gupfira mu mirwano hagati y'ingabo z'Armenia n'iz'Azerbaijan yatangiye
ku cyumweru, zipfa akarere k'imisozi ka Nagorno-Karabakh. Iyi mirwano ubu isa
noneho nk'irimo kurenga akarere ka Nagorno-Karabakh, Armenia n'Azerbaijan buri
ruhande rushinja urundi kurasa ku butaka bwarwo.
Buri ruhande runashinja urundi gutangiza imirwano.Mu gihe
Turukiya ishiyigikiye Azerbaijan, Uburusiya - bufite ikigo cya gisirikare muri
Armenia ariko bukaba ari n'inshuti y'Azerbaijan - bwasabye impande zombi guhita
zihagarika imirwano zigatanga agahenge.
Umuvugizi wa Minisiteri y’ingabo y’Armenia yavuze ko indege
y'intambara y'Armenia yo mu bwoko bwa SU-25 yahanuwe ejo ku wa kabiri mu
gitondo, umupilote wayo agahita apfa.Aciye k’urubuga rwa Facebook, Madamu
Stepanyan yavuze ko indege y'intambara ya Turukiya yo mu bwoko bwa F-16 yagenze
intera ya kilometero 60 imbere mu kirere cy'Armenia. Akimara gutangaza ibi Turukiya
yahise ibihakana ivuga ko "nta kuri na busa" kwabyo.
Mu magambo yatangajwe na Fahrettin Altun umujyanama wa Perezida
Recep Tayyip Erdogan wa Turukiya, yagize ati "Armenia ikwiye kuva mu
turere yafashe aho kujya mu mayeri ya nta kigenda y'icengezamatwara
ry'ibinyoma".
Src:bbc
TANGA IGITECYEREZO