RFL
Kigali

Joe Biden ati "Wafunga umunwa, wa mugabo we?” Menya byinshi ku kiganiro mpaka cya Trump na Biden

Yanditswe na: Eric Misigaro
Taliki:30/09/2020 10:17
0

Ni ikiganiro mpaka cyaranzwe no gucyocyorana cyane ndetse biremezwako ari cyo cyagaragaje ubukana mu bya vuba muri Amerika. Mu minota igera kuri 90 y’ikiganiro, Trump yagaragaje imyitwarire idahwitse kuko yaciye mu ijamabo Joe Biden inshuro zigera ku 73 bigera aho uyu byamunaniye kwihangana agira ati ”Wafunga umunwa wa mugabo?!”.



Iki kiganiro cyari kiraje ishinga benshi. Ni ikiganiro mpaka cyabereye mu mujyi wa Cleveland muri leta ya Ohio hagati ya Perezida Donald Trump na Joe Biden bahanganiye umwanya wa Perezida wa Leta Zunze Ubumwe za Amerika. Cyaranzwe n'akajagari, guterana amagambo no gucanamo kenshi.

- Ni nde watsinze iki kiganiro mpaka cya mbere?

Ku ruhande rw’abaturage babibonye gute?

- Ni iyihe mpamvu yatumye benshi banenga umunyamakuru Chris Wellace wayoboye iki kiganiro?

Ingingo nyamukuru zibanzweho n'aba bakandida zari: Coronavirus n'ivanguramoko. Trump yaciye mu ijambo kenshi Biden ari kuvuga, kugeza ubwo uyu amubwiye ati: "Wafunga umunwa, wa mugabo we?!"


Mu kiganiro cyabaye mu ijoro [ku masaha yaho] kikamara iminota 90, Bwana Trump yaciye mu ijambo Bwana Biden inshuro 73. Amakusanyabitekerezo arerekana ko ari cyo kiganiro kibi cyane kibayeho mu mateka ya vuba y'abashaka gutegeka Amerika, abantu 69% bavuze ko cyabateye umujinya.

Ese byari byifashe gute muri iki kiganiro bwana Donald Trump yagaragayemo asa n'ushaka kwiharira ijambo?

Muri iki kiganiro hagaragayemo ubwumvakane buke, gusa ntabwo byatunguraga benshi kuko aba bombi basanzwe bagaragara nk'abataripfana ndetse byabaye amahire n'ubundi cyari ikiganiro mpaka. Ni impaka zagaragayemo gushwana kwa hato na hato hagati y'aba bagabo, ndetse no gushwana hagati ya Trump na Chris Wallace wari uyoboye ikiganiro wageze ubwo yihaniza Trump kubera kwica amategeko y'ikiganiro.


Rwari urugamba rwarwanwaga hifashishwe intwaro z’iminwa, aba bombi bibanze cyane kuri Covid-19, ubukungu, uko amatora azakorwa n'ivanguramoko. Bwana Biden yaneguye cyane uko mukeba we yitwaye imbere y'iki cyorezo, amushinja kuba nyirabayazana w'ibyago kimaze guteza muri Leta Zunze Ubumwe za Amerika.

Bwana Trump yavuze ko yarwanye urugamba rukomeye n'iki cyorezo, ko ubukungu ubu buri "kuzahuka ku muvuduko nk'uw'inyuguti ya V". Avuga ko iyo biba ari ku bwa Biden ibintu byari kuba bibi kurushaho.

Bwana Joe Biden wahoze ari Visi Perezida yahise agira ati: "Twamusigiye ubukungu buhagaze neza, arabwangiza". Trump ahita amusubiza ati: "Nagaruye imirimo 700,000".

Ahantu hamwe muri iki kiganiro Bwana Trump yavuze ko imyigaragambyo yo kurwanya ivanguraruhu muri Amerika iri gukorwa n'abo ku ruhande rw'abademokarate aho kuba abarepubulikani.

Ibi byagaragaye ko byarakaje abantu benshi ku mbuga nkoranyambaga, cyane ko Bwana Trump atigeze yamagana abafite ingengabitekerezo ishyira hejuru abo mu bwoko bw'abazungu.

Mu ijwi riri hejuru Trump ati 'Nishyuye miliyoni z'amadorari y'imisoro'

Chris wari uyoboye ikiganiro yabajije Trump ati: "Ni ukuri koko wishyuye $750 y'imisoro ya leta ku mwaka umwe muri iriya myaka? [2017 na 2016]". Bwana Trump ati: "Nishyuye miliyoni z'amadorari. Nishyuye miliyoni $38 umwaka umwe. Nishyuye miliyoni $27 umwaka umwe". 

Biden yahise amusaba kwerekana ibyemeza ko yayishuye, maze Trump ati: "Uzabibona nibirangira" - avuga ku igenzura riri gukorwa ku misoro yatanze. Gusa, nta tegeko rimubuza kubyerekana ubu.

Ese igihe cyakoreshejwe gute? Uko ingingo nyamakuru zagiye zigarukwaho (Covid-19, ubukungu, ivanguramoko)

Mu minota 90, Coronavirus bayivuzeho iminota 20, bateranye amagambo cyane ku byo batumvikana ku ngaruka zayo ku bukungu, inkingo, uko Trump yabyitwayemo ndetse n'udupfukamunwa. Ivanguramoko n'urugomo byafashe iminota 17, uko amatora azagenda byafashe iminota 11 naho ihindagurika ry'ikirere barimazeho iminota 10.

Trump yavuze umwanya muto ugereranyije na Biden, iminota 38 naho uyu wahoze ari visi perezida yamaze iminota 43 avuga. Gusa mu gucana mu ijambo, Trump yaciye mu ijambo mukeba we inshuro 73. Kuba mu 2016 Trump yaraciye mu ijambo mukeba we Hillary Clinton inshuro 37 byatutumye benshi babona ko ubu bidasanzwe, gusa byari icyo gihe, ubu ni ubu.

Ni nde watsinze impaka?

Ikusanyabitekerezo ryakozwe na CBS News na BBC News rivuga ko Joe Biden ari we watsinze iki kiganiro mpaka cya mbere cy'aba bakandida. Ku batoye, 48% bavuze ko Biden yatsinze, naho 41% bavuga Trump, 10% bo bavuze ko baguye miswi.

Abantu 69% batoye bavuze ko iki kiganiro cyabateye umujinya, 19% bavuga ko cyabateye kubona imbere atari heza. Ku byiza, 31% bavuze ko cyabaye icyo kubahugenza naho 17% ko cyabahaye amakuru.


        Chris Wellace wicaye niwe wari uyoboye ikiganiro 

Umunyamakuru Chris Wellace wa Fox News wayoboye iki kiganiro, bamwe bavuze ko ari we wabyitwayemo nabi mu kutabasha guhosha gucana mu magambo ngo bahane umwanya mu kiganiro.

Ku musozo wacyo, ukiyoboye ababajije niba bombi bazasaba ituze amatora arangiye, Biden yavuze ko azategereza kugeza ibyayavuyemo bigenzuwe n'abigenga.

Trump we yongeye kugaragaza impungenge ku gutora hakoreshejwe ikoranabuhanga, asaba abamushyigikiye "kuzajya ahabarwa amajwi bakareba buri kimwe cyose neza".

Aba bagabo bazongera guhura mu kiganiro mpaka - kibanziriza icya nyuma - tariki 15 z'ukwezi gutaha kwa 10 i Miami muri Florida.

Abo bagennye ko bababera ba visi perezida, Mike Pence wa Trump na Kamala Harris wa Biden, na bo bazakora ikiganiro mpaka ku wa gatatu w'icyumweru gitaha tariki 07/10. Abanyamakuru bavuze kuri iki kiganiro cyarimo gucyocyorana cyane, bo bavuze ko uwatsinzwe nyawe ari igihugu, ndetse n'ikusanyabitekerezo risa n'iribihamya.

Sr: BBC, Washington post 






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND