RFL
Kigali

Aubameyang mu kirenge cya Thierry Henry! Arteta ati iki?

Yanditswe na: SAFARI Garcon
Taliki:16/09/2020 11:17
0

Nyuma y'uko kapiteni w’ikipe ya Arsenal, Pierre Emerick Aubameyang yongereye amasezerano y’imyaka itatu muri Arsenal, byashimishije abafana b’iyi kipe batari bacye batangiye kumugereranya na Thierry Henry wanditse amateka akomeye muri iyi kipe, mu gihe umutoza Arteta yamuvuze imyato, yemeza ko ari umuyobozi mu kibuga igikeneye.



Uyu Munya-Gabon w'imyaka 31 y'amavuko, yageze muri iyi kipe mu kwezi kwa mbere mu mwaka wa 2018. Mu mwaka we wa mbere w'imikino wa 2018-2019, yegukanye igihembo cy'urukweto rwa zahabu (Golden Boot) cy'uwatsinze ibitego byinshi kurusha abandi muri Premier League.

Amasezerano Aubameyang yari asanganywe muri Arsenal yari kurangirana n'umwaka w'imikino wa 2020-2021, bivuze ko guhera mu kwezi kwa mbere yashoboraga gutangira kuganira n'andi makipe.

Nyuma yo kongera amasezerano yagize ati: "Gushyira umukono kuri kontaro yo gukinira iyi kipe idasanzwe nta na rimwe nigeze mbishidikanyaho. Nemera Arsenal. Dushobora kugera ku bintu bikomeye twese hamwe. Dufite ikintu gishimishije hano kandi nemera ko ibyiza biri imbere kuri Arsenal".

Gushyira umukono ku masezerano mashya byashimishije cyane abafana ba Arsenal henshi ku isi, bakunze kumubonamo umukinnyi ubibutsa Thierry Henry na we wabaye kapiteni w'iyi kipe.

Henry, ubu utoza ikipe ya Montreal Impact muri Canada, yakiniye Arsenal imikino 377 ayitsindira ibitego 228 mu myaka umunani.

Kuva yagera muri Arsenal - aguzwe miliyoni 56 z'amapawundi yari yo ya mbere menshi iguze umukinnyi, Aubameyang amaze kuyitsindira ibitego 72 mu mikino 111 mu marushanwa yose. 

Ibi bituma bamwe babona ari mu nzira nziza atera ikirenge mu cya Thierry Henry, mu gihe yagumana n'iyi kipe indi myaka myinshi.

Umutoza Mikel Arteta wa Arsenal yagize ati: "Byari ingenzi ko Pierre-Emerick agumana natwe. Ni umukinnyi mwiza cyane utekereza bitangaje. Kuba ari umukinnyi wakoresheje igihe gito cyane ngo ageze ku bitego 50 muri iyi kipe bikubwira buri kintu cyose ucyeneye kumumenyaho n'uburyo akoramo".

"Ni umuyobozi w'ingenzi w'ikipe kandi ni inkingi ikomeye y'ibyo turimo kubaka. Arashaka kuba mu bakinnyi beza cyane ku isi akagira icyo asiga agezeho azibukirwaho. Ibyo ashobora kubigeraho ari hano muri Arsenal".

Mu mukino wa mbere wa shampiyona y’u Bwongereza y’umwaka w’imikino wa 2020/21, Arsenal yatangiye neza itsinda Fulham 3-0, Aubameyang akaba yaratsinzemo igitego 1. Ku mukino w’umunsi wa kabiri w’iyi shampiyona, Arsenal izakina na Westham United mu mukino uteganyijwe tariki 19 Nzeri 2020. 

Aubameyang yatangiye gushyirwa ku rwego rumwe na Thierry Henry ufite uduhigo twinshi muri Arsenal

Thierry yanditse amateka akomeye muri Arsenal

Aubameyang ni umwe mu bakinnyi bahetse ikipe ya Arsenal






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND