RFL
Kigali

Ukumira umwanzi amwima inzira! Makanyaga Abdul yakoze indirimbo ikangurira kurwanya Covid-19-VIDEO

Yanditswe na: Janvier Iyamuremye
Taliki:16/09/2020 9:05
0

Umuhanzi Makanyaga Abdul utanga ibyishimo ku bisekuru byombi, yasohoye amashusho y’indirimbo nshya yise ‘Twirinde Coronavirus’ isaba buri wese gushyiraho ake mu rugamba rwo guhangana na Covid-19.



Makanyaga Abdul aririmba avuga ko nta munsi n’umwe abantu bataburirwa ko Coronavirus ari icyorezo simusiga, kandi ko bakwiye gukomeza kukirinda mu migirire yabo ya buri munsi.

Uyu muhanzi avuga ko Coronavirus ikomeje gufata indi ntera mu bihugu bitandukanye, ko uko bucyeye n’uko bwije ari agahinda mu miryango itandukanye, itakaza ababo.

Avuga Covid-19 yazanye ubumara bumaze abantu, agasaba buri wese kwinjira mu rugamba rwo kuyihashya "dore irarekejere."

Makanyaga akangurira buri wese gukomeza gukurikiza ingamba zashyizweho zo kwirinda Coronavirus zirimo gukaraba intoki neza kandi kenshi, kwambara agapfukamunwa igihe ugiye ahari abantu benshi.

Avuga ko iki ari atari igihe cyo gutuma abakiri bato, kuko bashobora guhura n’abayanduye Covid-19. Uyu muhanzi avuga ko Covid-19 ari indwara idasanzwe, kuko uyirwaye adasurwa bitewe n’uko ubwandu bwayo ari icyorezo.

Makanyaga akomeza avuga ko nta rukingo rwa Covid-19, bityo ko utayirinze yagucura umwuka wowe n’umuryango wawe. Asaba buri wese, kwirinda ingendo zitari ngombwa, guhoraberana, gusomana n’ibindi bishobora gukwirakwiza ubwandu.

Uyu muhanzi avuga ko Coronavirus yagize ingaruka zikomeye ku bukungu bw’isi, ingendo z’indege zirahagarikwa, imirimo n’ubuhinzi birahagarara, amashuri n’inganda birakinga; bituma inzara n’ubukene bisizora.

Makanyaga avuga ko mu bimenyetso bya Coronavirus harimo guhumeka nabi, kwitsamura no gukorora cyane, kubabara mu muhugo, kugira umuriro ukabije n’umusonga.

Asaba buri wese wumva ufite ibi bimenyetso, guhamagara nimero itishyurwa ya 114.

Makanyaga asohoye aya mashusho y’indirimbo mu gihe aherutse kuririmba mu iserukiramuco rya Iwacu Muzika Festival, yakumbujemo benshi igisope. Yaririmbye ibihangano bye bitandukanye byakanyujijeho birimo 'Urukundo', 'Nshatse Inshuti' n'izindi.

Mu ijoro ry’uyu wa Kabiri tariki 15 Nzeri 2020, Minisiterri y’Ubuzima, yatangaje ko abantu 22 banduye Coronavirus barimo 18 b’i Kigali (bapimwe mu bibasiwe kurusha abandi), babiri b’i Rubavu, umwe w’i Kirehe n’umwe wa Nyabihu.

Iyi Minisiteri yanavuze ko abantu 31 bakize. Abamaze kwandura Coronavirus mu Rwanda ni 4,624 (+22), abakize ni 2,767 (+31) n’aho abitabye Imana ni 22. Ni mu gihe abakirwaye ari 1,835.

Umuhanzi Makanyaga Abdul yasohoye amashusho y'indirimbo ikangurira abantu gukomeza kwirinda icyorezo cya Covid-19 gihangayikishije Isi muri iki gihe

KANDA HANO UREBE AMASHUSHO Y'INDIRIMBO "TWIRINDE CORONAVIRUS" YA MAKANYAGA ABDOUL

">







TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND