RFL
Kigali

Abagera kuri 50 berekanye impano imbere y’akanama nkemurampaka k’irushanwa ‘Head’s Up’

Yanditswe na: Janvier Iyamuremye
Taliki:14/09/2020 12:48
0

Abanyempano ba mbere batangiye kwigaragaza mu irushanwa ry’umuziki ‘Head’s Up Music Competition’’ rizahemba Miliyoni 1 Frw. Iri rushanwa ryatangiye mu mpera z’iki Cyumweru.



Ibirori bitangiza ku mugaragaro iri rushanwa ryateguwe n’ikigo cy’itangazamakuru cya ‘Genesis Broadcasting Network’, byabaye ku wa Gatanu tariki 11 Nzeri 2020.

Kuri uwo munsi, habaye ibikorwa bitandukanye birimo igitaramo cy’abahanzi cyatambutse kuri Genesis Tv mu rwego rwo guha ikaze abantu mu irushanwa ‘Head’s Up’ rigamije gushyigikira impano nshya mu muziki w’u Rwanda.

Iki gitaramo cyaririmbyemo itsinda rya Neptunez Band rimenyerewe mu bitaramo bya Kigali Jazz Junction na Platini uherutse gusohora amashusho y’indirimbo ‘Ntabirenze’ yakoranye na Butera Knowless.

Ku wa Gatandatu, abahanzi ba mbere 25 bagaragaje impano zabo mu irushanwa ‘Head’s Up Music’. Wari wo munsi wa mbere w’iri rushanwa.

Umuyobozi wa Genesis TV, Niragire Marie France, atangiza irushanwa ‘Head’s Up Music’, yavuze ko intego yabo ari ugufasha abana bafite impano yo kuririmba ariko babuze ubushobozi kugira ngo babashe kugera kure.

Niragire ati “Gukora ibi nta y’indi nyungu mbifitemo ahubwo ni urukundo rw’umuziki kuko njya mbona abana benshi bafite impano ariko babuze ubushobozi cyangwa se aho banyura kugira ngo abantu babamenye. Ni nayo mpamvu tuzabakorera indirimbo tukabaha n’andi mafaranga azabafasha muri urwo rugendo.”

Muri iri rushanwa hiyandikishije abasaga 300, hatoranywamo 100 ari nabo bemerewe guhatana mu ijonjora rya mbere.

Muri abo 100 hamaze gukora abagera kuri 50 abandi basigaye nabo baziyerekana mu mpera z’iki cyumweru tariki ya 19 na 20 Nzeri 2020.

Aba 100 biteganyijwe ko hazakurwamo 60 hasigaramo 40 ari nabo bazakomeza mu cyiciro kibanziriza icya nyuma kizaba tariki ya 24 na 25 Ukwakira 2020.

Mu bagize akanama nkemurampaka hiyambajwe cyane abasanzwe bakorera indirimbo abahanzi (Producers). Impamvu aribo bahisemo gukoresha ngo ni uko aba ari abantu bazi iby’umuziki kuko basanzwe babana n’abahanzi umunsi ku wundi.

Muri iyi minsi ibiri ishize abagaragaye mu bagize akanama nkemurampaka hari harimo Producer Maurix music wakanyujijeho akorera indirimbo abahanzi barimo Tom Close akaza kujya hanze. Undi bafatanyije na Producer Fazzo.

Irushanwa biteganyijwe ko rizasozwa tariki ya 26 Ukuboza 2020, hazahembwa batatu bazaba babaye aba mbere.

Uwa mbere azakorerwa indirimbo esheshatu (Mini album) ndetse n’amashusho y’indirimbo ebyiri. Nyuma y’ibyo azanahabwa miliyoni 1 Frw.

Uwa kabiri azahembwa ibihumbi 500 Frw mu gihe uwa gatatu we azahabwa ibihumbi 300 Frw.

Abahanzi ba mbere berekanye impano zabo mu irushanwa 'Head's Up' iri kuba ku nshuro ya mbere


Itsinda rya Neptunez Band rizwi mu bitaramo bikomeye ryasusurukije ibirori byo gutangiza iri rushanwa

Umuhanzi Platini Nemeye na Mc Tino mu itangizwa ry'irushanwa 'Head's Up' rizahemba miliyoni 1 Frw

Producer Fazzo, umunyamakuru Bona Kuku, Marie France Niragire mu bagize akanama nkemurampaka k'irushanwa "Head's Up"





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND