RFL
Kigali

Arsenal yatangiye neza shampiyona y’u Bwongereza inyagirira Fulham mu rugo - AMAFOTO

Yanditswe na: SAFARI Garcon
Taliki:12/09/2020 15:57
0

Ibitego bya Lacazette,Gabriel na Aubameyang, byari bihagije ngo ikipe ya Arsenal yegukane amanota atatu ya mbere muri shampiyona y’u Bwongereza 2020/21, nyuma yo gutsindira Fulham ikubutse muri Championship ku kibuga cyayo ibitego 3-0.



Umukino wafunguye shampiyona y’u Bwongereza ‘Premier League’ mu mwaka w’imikino wa 2020/21, wabereye ku kibuga cya Craven Cottage cya Fulham yari yakiriye Arsenal, ukaba wayobowe n’umusifuzi w’umwongereza Chris Kavanagh.

Ikipe ya Fulham yatangiye umukino neza ihusha uburyo bw’igitego ku munota wa mbere, nyuma y’ikosa ryari rikozwe na myugariro mushya ukomoka muri Brazil, Gabriel do Santos, ariko ku bw’amahirwe macye ya Fulham uburyo bagerageje buranga.

Arsenal yafunguye amazamu ku munota wa 9 nyuma y’akavuyo k’amashoti menshi yatewe mu izamu ry’ikipe ya Fulham n’abakinnyi barimo Granit Xhaka na Willian, umupira uragaruka usanga rutahizamu w’Umufaransa Alexandre Lacazette ahagaze neza arekura ishoti rikomeye mu izamu, atsinda igitego cya mbere cya Arsenal, ahita anaca agahigo ko gutsinda igitego cya mbere muri Premier League y’umwaka w’imikino wa 2020/21.

Ku munota wa 29 ikipe ya Arsenal yabonye uburyo bwo gutsinda igitego cya kabiri ku mupira w’umuterekano (Coup Franc) watewe n’umunya-Brazil Willian, ariko ugarurwa n’igiti cyizamu uvamo.

Fulham yakomeje gukina neza ishakisha aho yamenera ngo yishyure igitego yatsinzwe hakiri kane, ariko Arsenal ikomeza kuyibera ibamba kuko nayo itayihaye agahenge kuko yageragezaga uburyo bwose ishaka gutsinda igitego cya kabiri, ariko iminota 45 y’igice cya mbere irangira Arsenal iyoboye ku ntsinzi 1-0.

Igice cya kabiri cyatangiye Arsenal yotsa igitutu ubwugarizi bwa Fulham, byagaragaraga ko yashakaga igitego cya kabiri mu minota 15 ya mbere.

Ku munota wa 48 Arsenal yabonye Corner, maze iterwa neza na Willian, arasimbuka myugariro Gabriel asumba abakinnyi bose ba Fulham, atsinda igitego cya kabiri cya Arsenal ku munota wa 49 w’umukino.

Fulham ntiyacitse intege kuko yakomeje gukina neza ishaka uburyo bwo kwishyura.

Ku munota wa 57 Arsenal yatsinze igitego cya gatatu cyatsinzwe na kapiteni Pierre Emerick Aubameyang ku mupira wari uvuye kwa Willian.

Arsenal yakomeje gukina neza no kubonana neza mu kibuga hagati, inagera imbere y’izamu inshuro nyinshi binyuze ku bakinnyi barimo Lacazette na Aubameyang ariko kuboneza mu izamu biranga.

Ku munota wa 75, umutoza Mikel Arteta yakoze impinduka, avana mu kibuga Willian watanze imipira ibiri yavuyemo ibitego muri uyu mukino, hinjira umunya-Cote d’Ivoire Nicolasw Pepe, ku munota wa 78 Granit Xhaka arasohoka hinjira Daniel Ceballos.

Arsenal yakomeje gukina neza, yanyuzagamo igakinira cyane mu kibuga hagati kubera ko yarushaga Fulham ku buryo bugaragara, inakomeza guhusha ibitego byinshi.

Iminota 90 y’umukino yarangiye Arsenal yegukanye amanota atatu mbumbe nyuma yo gutsinda Fulham iyisanze ku kibuga cyayo ibitego 3-0.

Arsenal izagaruka mu kibuga ikina umukino w’umunsi wa kabiri muri Premier League tariki 19 Nzeri 2020, ikina n’ikipe ya Westham United.

Dore uko umunsi wa mbere wa Premier League 2020/21 uteye:

Ku wa Gatandatu

  • Fulham 0-3 Arsenal
  • Crystal Palace vs Southampton (16:00)
  • Liverpool vs Leeds (18:30)
  • West Ham vs Newcastle (21:00)

Ku Cyumweru

  • Tottenham vs Everton
  • West Brom vs Leicester City

Ku wa Mbere

  • Brighton vs Chelsea
  • Sheffield United vs Wolves

  • Lacazette yatsinze igitego cya mbere muri uyu mukino


  • Gabriel yatsinze igitego cya kabiri cya Arsenal

  • Gabriel yishimira igitego cya mbere atsindiye Arsenal kuva yayigeramo avuye mu Bufaransa

  • Abakinnyi ba Arsenal bishimira igitego cya Gabriel

  • Aubameyang yatsinze igitego cya gatatu cya Arsenal


  • Aubameyang ashimira Willian wamuhaye umupira wavuyemo igitego



  • Abakinnyi ba Arsenal bishimira intsinzi ya mbere muri Premier League

  • Arteta yatangiye neza shampiyona abona amanota atatu akuye hanze





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND