RFL
Kigali

Coronavirus: Mu gihe urukingo rwaboneka kurugeza ku batuye Isi bizasaba indege 8,000 za rutura

Yanditswe na: Eric Misigaro
Taliki:10/09/2020 13:44
0

Abatuye Isi basaga Miliyari 7.8, muri iyi minsi hafi ya bose bari mu icuraburindi batewe na Covid-19 yabateye itateguje. Nubwo nta rukingo cyangwa umuti uraboneka abahanga mu bwikorezi bari kuvuga ko kugira ngo urukingo rwa coronavirus niruramuka rubonetse ruzagere mu bice bitandukanye by’Isi bizaba aribwo bwikorezi bwa mbere bugoranye cyane.



Ni kenshi benshi twibaza igihe urukingo rw’iki cyorezo ruzabonekera, abandi nabo bakibaza bati 'ese niruboneka ubundi ruzabageraho gute? Bazarugura angahe?'. Ibi bibazo byose ni byo bishyira mu rujijo abatuye Isi.  

Ishyirahamwe mpuzamahanga rw'ubwikorezi mu ndege (IATA) ritangaza ko mu gihe urukingo ruzaramuka rubonetse bizasaba ko haboneka indege 8,000 zo mu bwoko bwa Boeing 747 kugira ngo abatuye Isi babashe kubona kuri uru rukingo.


                        Boeing 747

Nta rukingo rwa Covid-19 ruraboneka kugeza ubu, ariko IATA yamaze gutangira gukorana na kompanyi z'indege, ibibuga by'indege, inzego z'ubuzima zo ku isi n'inganda zikora imiti ku buryo urwo rukingo rwazagezwa mu bice bitandukanye byo ku isi.

Izo ndege zikenewe, ni mu gihe bifatwa ko buri muntu wo ku isi yakenera doze (dose) imwe gusa y'urukingo. Alexandre de Juniac, umuyobozi mukuru wa IATA, yagize ati: "Gutwara inkingo za Covid-19 mu mutekano bizaba ari bwo butumwa buranze iki kinyejana mu rwego rw'ubwikorezi mu ndege. Ariko ibyo ntibizaba hatabayeho kubitegurana ubushishozi hakiri kare. Kandi igihe cyo kubikora ni iki".

Mu gihe kompanyi z'indege zimaze igihe zibanda ku gutwara imizigo, muri iki gihe gutwara abantu byajemo ingorane kubera kwirinda coronavirus, gutwara inkingo mu ndege byo ni urusobe kurushaho.

Ntabwo ari indege zose zifite ubushobozi bwo gutwara inkingo kuko gutwarwa imiti bicyenera ahantu hafite igipimo cy'ubushyuhe buri hagati ya dogere 2C na 8C. Gutwara inkingo zimwe bishobora gusaba ubukonje bwa dogere 0C, ibyo bikaba byatuma hari indege nyinshi zidafite ubushobozi bwo kuzitwara.

Glyn Hughes, ukuriye ubwikorezi bw'imizigo mu ishyirahamwe IATA, yongeyeho ati: "Tuzi neza uburyo bikorwamo. Icyo ducyeneye gukora ubu ni ukongera ubushobozi bukagera ku rwego ruzaba rucyenewe".

Yavuze ko ingendo z'indege mu bice bimwe byo ku isi, birimo nka bimwe byo muri Aziya y'amajyepfo ashyira uburasirazuba, zizaba ari ingenzi kuko aho hantu nta bushobozi bwo gukora inkingo buhari.

Kurugeza muri Afurika bizasaba iki?

Ishyirahamwe IATA rivuga ko kugeza muri Afurika urukingo rwa Covid-19 - rubaye rubonetse - muri iki gihe "bitashoboka" kubera ko nta bushobozi buhari bwo gutwara imizigo, ingano y'akarere k'Afurika n'urusobe rw'ibibazo byo kwambuka imipaka.

IATA ivuga ko ubu bwikorezi buzasaba "gukorwa neza bijya gusa nk'igikorwa cya gisirikare", ndetse bisabe ko habaho ahantu hahehereye hazabikwa izo nkingo. Inkingo zigera hafi ku 140 ku isi ziri mu cyiciro cy'ibanze cyo gukorwa, naho izibarirwa muri za mirongo ubu zirimo kugeragerezwa ku bantu.

Muri izo ziri kugeragerezwa ku bantu harimo n'urwa Kaminuza ya Oxford yo mu Bwongereza rumaze kugera mu cyiciro cya nyuma cy'igeragezwa.

Ishyirahamwe IATA ryasabye za leta z'ibihugu gutangira ubu gutegurana ubushishozi kugira ngo zitegure neza igihe inkingo zizaba zimaze kwemezwa zinatangiye gukwirakwizwa ku isi.

Usibye gutegura uburyo zitabwaho kandi zigatwarwa mu bipimo by'ubushyuhe bya ngombwa, umutekano nawo ni ikindi kibazo. IATA yongeyeho iti: "Inkingo zizaba ari ibicuruzwa bifite agaciro gakomeye cyane. Hagomba gutegurwa uburyo imizigo yazo ibikwa mu mutekano ntivogerwe kandi ntiyibwe".

Src: BBC 






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND