RFL
Kigali

Imyigaragambyo yaciye ibintu i Catalonia! Abafana ba Barcelona ntibifuza ko Messi agenda

Yanditswe na: SAFARI Garcon
Taliki:26/08/2020 16:54
0

Abafana n’abakunzi b’ikipe ya FC Barcelone bakoze imyigaragambyo yabereye imbere ya stade yayo Camp Nou, nyuma y’uko bimenyekanye ko kizigenza ufatwa nk’umucunguzi wa Barcelona, Lionel Messi, yamenyesheje ubuyobozi bw’iyi kipe ko agomba kuyisohokamo muri iyi mpeshyi.



Iyi myigaragambyo yabaye mu ijoro ryo ku wa kabiri tariki 26 Kanama 2020, nyuma y'uko hatangajwe ko Messi agiye kuva muri iyi kipe yahesheje ibikombe bine bya Champions League.

Abigaragambya batijwe umurindi n’itangazamakuru ryo muri Argentine, ryatangaje ko Messi yafashe icyemezo cyo gusohoka muri Barcelona nyuma yo kubwirwa n’umutoza mushya, Ronald Koeman, ko agomba gucisha make agakorera ikipe, nta cyubahiro cyo kumva ko ari hejuru.

Abafana ba FC Barcelone bagiye hanze ya Stade Camp Nou mu ijoro, bigaragambya basaba ko Perezida w’ikipe, Josep Maria Bortemeu yegura, hagasigara Lionel Messi.

Ibitangazamakuru byo muri Espagne byatangaje ko Lionel Messi ubwe yibwiriye Pep.Guardiola wamutoje ko agiye kuza bakongera gukorana muri Manchester City.

Byatangajwe kenshi ko Pep Guardiola yasabye ubuyobozi bwe kuzakora ibishoboka byose bagasinyisha Lionel Messi igihe azaba yemeye kuva muri FC Barcelona.

Messi arifuza kuva muri FC Barcelona kubera ko nta gahunda ihamye yo kubaka ikipe ikomeye yahatanira ibikombe byose nkuko byari bimeze mu myaka mike ishize.

Mu myaka 3 ishize,FC Barcelona yasezerewe mu buryo bubabaje n’amakipe arimo AS Roma,Liverpool na Bayern Munich bituma Messi asaba impinduka zitigeze zikorwa.

Manchester City ihanganye na PSG yo mu Bufaransa ndetse na Inter Milan yo mu Butaliyani nayo yiteguye gutanga amafaranga atubutse kugira ngo yegukane uyui kizigenza umaze kwegukana Ballon d’Or esheshatu.

Ubuyobozi bw’ikipe ya FC Barcelona bugomba guterana vuba aha bugafata umwanzuro ku kibazo cya Messi cyatangiye gukurura umwuka mubi ndetse no kwigumura mu bafana.

Abafana ba FC Barcelona bigaragambije nyuma yo kumenya ko Messi agiye kugenda

Abafana barifuza ko Perezida wa Barcelona yegura, Messi akaguma mu ikipe





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND