RFL
Kigali

Andy Mwag, yasohoye ‘EP’ iriho indirimbo ivuga ubuzima bugoye we n'abavandimwe be baciyemo

Yanditswe na: Janvier Iyamuremye
Taliki:24/08/2020 14:49
0

Umuhanzi ukomoka mu Burundi umaze imyaka itanu akorera umuziki mu Rwanda, Andy Mwag yasohoye ‘Ep’ y’indirimbo eshanu zirimo imwe ivuga ku buzima bugoye yanyuzemo n’abavandimwe be nyuma y'uko ababyeyi babo bitabye Imana.



Andy Mwag ni umuhanzi w’umuhanga uzi gucuranga gitari mu buryo bukomeye. Indirimbo ze yaziririmbye mu Kinyarwanda, Ikirundi, Igifaransa, Icyongereza n’Igiswahili, ndetse zumvikana ko zitondewe muri studio. 

Ndabaneze Andre uzwi nka Andy Mwag yatangiye urugendo rw’umuziki mu 2007 aza gutura mu Rwanda kuva mu 2015 aho abana n’umugore we bafitanye abana babiri kugeza ubu.  Yavukiye mu Mujyi wa Bujumbura mu Burundi mu 1990, mu muryango w’abana akaba ari we mfura. 

Andy yabanje kubyina mu matsinda yo ku ishuri aza no kwisanga muri ‘Band’ z’umuziki zitandukanye. Yacuranze gitari muri ‘Band’ nka Remesha Band, Umudiho Groove yo muri Center Jeune Kamenge, Sikiliza Band, Don Bosco Band n’izindi. 

Andy yakuriye mu muryango wakundaga umuziki, ku buryo Se yajyaga amwumvisha indirimbo zitandukanye yifashishije Radio-Ibintu byatumye Andy akunda umuziki kugeza n’ubu. Indirimbo ya mbere yasohoye yitwa ‘Ndagukunda’ yakoreye muri Menya Media. 

Ni indirimbo avuga ko yamuciriye inzira, ariko kandi inavuga ku buzima bwe bw’urukundo.  Ubu yasohoye ‘Ep’ yakubiyeho indirimbo eshanu zirimo ‘Nisaidie’, ‘Rafiki Badilika’, ‘Amarira’, ‘Get There’ na ‘Your Love is my love’ yakoranye na Plamy Mwaga.

Andy yabwiye INYARWANDA, ko mu ndirimbo zose yakubiye kuri iyi ‘Ep’, iyitwa ‘Nisaidie’ ariyo ivuga ku buzima bwe, aho yagarutse ku buzima butoroshye yanyuranyemo n’umuryango we mu gihe cy’intambara mu Burundi. Iyi ndirimbo igaragaza igice cy’ubuzima bwe. Avuga ko yapfushije ababyeyi akiri muto cyane, aho Se yishwe mu ntambara yo mu Burundi mu 1993.

Ati “...Kuva icyo gihe ubuzima bwacu bwarahindutse cyane. Mama yamaraga iminsi ashakisha uko yatugaburira kandi akadutera inkunga.” Avuga ko icyo gihe murumuna we na mushiki we bari bakiri bato. Ngo nyuma y’iminsi mike na Nyina yaje kwita Imana bitewe n’indwara.

KANDA HANO WUMVE 'EP' Y'UMUHANZI ANDY MWAG UMAZE IMYAKA ITANU MU RWANDA

Uyu muhanzi avuga ko kuva icyo gihe yahise agira inshingano zo kwita kuri barumuna be, banyura mu buzima bugoye bitewe n’imibereho itari myiza. Andy yavuze ko yagerageje kwita ku bavandimwe be nubwo bitagenze nk’uko yabishakaga, ndetse ngo nawe yize amashuri yisumbuye abifashijwemo na Padiri Irunga Désiré wa Don Bosco.

Uyu muhanzi avuga ko iyi ndirimbo ‘Nisaidie’ ayitezeho kumufungurira amarembo mu rugendo rwe rw’umuziki. Andy ukora injyana ya Afrosoul afite intego yo umuziki ku buryo azamenyekanisha impano ye, kandi akumuhuza n’abahanzi bakomeye ku Isi. Arashaka no kujya ategura ibitaramo bikomeye akimenyekanisha muri Afurika y’Iburasirazuba n’ahandi.

Umuhanzi Andy Mwag wo mu Burundi ariko ubarizwa mu Rwanda yasohoye 'EP' y'indirimbo eshanu

Andy yavuze ko indirimbo ye 'Nisaidie' ivuga ku buzima bugoye yaciyemo n'abavandimwe be nyuma y'uko ababyeyi bitabye Imana

KANDA HANO UREBE INDIRIMBO 'NISAIDIE' YA ANDY MWAG IRI KURI 'EP' YA MBERE YASOHOYE






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND