Abanyarwanda batatu baba muri diaspora Nyarwanda yo muri Afurika y’Epfo bashyize hamwe batangira gusohora filime y’uruhererekane bise “Impeta”.
Iyi filime yakiniwe mu cyaro cy’umujyi wa Cape Town. Agace ka mbere kayo kasohotse kuri uyu wa Gatandatu tariki 08 Kanama 2020, gafite iminota 17 n’amasegonda 56’.
‘Impeta’ iboneka kuri shene ya Youtube yitwa Cape Max Movies ishingiye ku buzima bwa buri munsi, urukundo no gushyamirana kw’imiryango y’iki gihe.
Moise Niyobugingo wakinnye muri iyi filime yitwa Gatete, yabwiye INYARWANDA, ko bahuje imbaraga ari batatu mu rwego rwo gushyigikira no guteza imbere impano zabo zitandukanye.
Avuga ko bakoze iyi filime bagamije kwigisha umuryango Nyarwanda uburyo bwo kubaho mu buzima buzira amakimbirane abera mu miryango.
Ati “Twashatse gushyira hamwe imbaraga kugira ngo dukuze impano zitandukanye ziri muri twe. Iyi filime irigisha umuryango Nyarwanda uburyo bwo kubaho mu buzima buzira amakimbirane.”
Niyobugingo yashimangiye ko iyi filime y’uruhererekane izanigisha urubyiruko “uburyo bwo gukora ndetse n’urukundo nyakuri.”
Avuga kandi bafite intego yo gukorera filime mu Rwanda mu rwego rwo kumenyekanisha ibyiza by’u Rwanda no kwagura ubukerarugendo.
Uko ari batatu banageze kure ikorwa ry’iyi filime kandi bidatinze bazatangira no gufata amashusho y’indi filime.
Aba banyarwanda bagize itsinda ryitwa “Cape Max Movies” ni Judah Manzi [Jackson Mandela], Moise Niyobugingo wakinnye yitwa Gatete na Honere Udahemuka wakinnye yitwa Yohana Ndemezo.
Moise Niyobugingo wakinnye muri iyi filime asanzwe ari umuvugabutumwa mu Itorero ry’Abadivantiste unakora imivugo. Akunze kandi kugaragara avuga imisango y’ubukwe bwa Kinyarwanda.
Honore we asanzwe akora imideli, aho yambika abageni ndetse anatoza kubyina indirimbo za Kinyarwanda muri Afurika y’Epfo.
Jackson Mandela wakinnye muri iyi filime asanzwe afite izindi filime yakinnyemo zirimo nka “Love in the Jungle”.
Jackson Mandela umukinnyi w'imena muri filime "Impeta" wakinnye yitwa Patrick
Moise Niyobugingo wakinnye muri filime "Impeta" yitwa Gatete
KANDA HANO UREBE AGACE KA MBERE KA FILIME "IMPETA" Y'ABANYARWANDA BATATU BABA MURI AFURIKA Y'EPFO
Eng
RSS 
Udahemuka Honere wakinnye yitwa Yohana Ndemezo
TANGA IGITECYEREZO