Airtel Rwanda
Kigali

Kwambara agapfukamunwa ni ugukunda igihugu! Trump yatangaje ko Covid-19 igihe kuba mbi mbere y'uko abantu bayitsinda

Yanditswe na: Eric Misigaro
Taliki:22/07/2020 11:00
0

Nyuma y'uko ibiro bikuru by’igihugu cy’Amerika byatangaje ko Covid-19 ishobora kuzahitana abari hagati y’ibihumbi 100-240, kuri iyi nshuro Donald Trump uyobora Leta Zunze Ubumwe z'Amerika yaburiye ko iki cyorezo muri iki gihugu gishobora "kuba kibi kurushaho mbere y'uko ibintu bimera neza". Yanasabye abaturage kwambara udupfukamunwa.



Perezida Trump aya magambo yayatangaje ubwo yari ari mu kiganiro n'abanyamakuru. Mu minsi yashize Trump yajyaga akora ibiganiro n’itangazamakuru gusa yari amaze iminsi yarabisubitse akaba yongeye gusubukura ibi ibiganiro. Kuri iyi nshuro, yumvikanye arushaho kugendera ku bintu byanditse yateguriwe byo kuvuga.

Bwana Trump yanasabye Abanyamerika bose kwambara udupfukamunwa, agira ati: "Twose dufite akamaro". Yongeraho ko tugaragaza "gukunda igihugu".

Perezida Trump ntabwo yari yambaye agapfukamunwa muri icyo kiganiro n'abanyamakuru. Mu bihe byashize, yari yarahinyuye udupfukamunwa avuga ko nta suku yatwo.

Amakuru avuga ko abajyanama be bamuhatiye ko kuri iyi nshuro yajya akoresha imvugo irimo kwigengesera kurushaho, muri iki gihe umubare w'abanduye coronavirus n'abo yica urushaho kwiyongera mu gihugu.

Kugeza ubu, abarenga 3,800,000 bamaze kwandura coronavirus muri Amerika, muri bo abarenga 140,000 imaze kubica, nkuko imibare ya Kaminuza ya Johns Hopkins ibigaragaza. Iyo mibare yo muri Amerika ni yo ya mbere iri hejuru cyane ku isi.

Ibiganiro n'abanyamakuru bya buri munsi bya Bwana Trump byari byarangiye mu kwezi kwa kane. Hari nyuma gato y'ikiganiro yagaragajemo kutagira icyo yitaho, ubwo yavugaga ko coronavirus ishobora kuvurwa abantu baterwa imiti isanzwe yica udukoko (disinfectant).

Mu kiganiro cye cya mbere n'abanyamakuru nyuma y'amezi yari ashize, cyabereye mu biro bye White House, Bwana Trump yumvikanye yagabanyije guhutiraho mu kuvuga.

Yumvikanishije gukurikiza inama z'itsinda ry'impuguke mu buvuzi ryo mu biro bye, asubiramo ibyo zimaze igihe zivuga, aburira agira ati:

"Birashoboka ko mu buryo bubabaje ibintu bizaba bibi kurushaho mbere yuko bimera neza".

Ati: "Icyo ni ikintu ntajya nkunda kuvuga ku bintu, ariko uko ni ko ibintu bimeze".

Yongeyeho ati: "Turi gusaba buri muntu wese ko igihe udashoboye gusiga intera hagati yawe n'undi muntu, ambara agapfukamunwa, shaka agapfukamunwa". "Waba ukunda ako gapfukamunwa cyangwa utagakunda, [udupfukamunwa] ni ingirakamaro kandi ducyeneye ikintu icyo ari cyo cyose dushobora kubona [cyadufasha]".


Trump ari gusoma imbwirwa ruhame yari yandikiwe ibintu adakunze gukora 

Ku nshuro zirenze imwe muri icyo kiganiro, Bwana Trump yavuze ko Covid-19 ari "virusi y'Ubushinwa" - ibyo Ubushinwa bwahakanye mu bihe bishize. Yakuye mu mufuka agapfukamunwa ke ari mu cyumba cyabereyemo icyo kiganiro n'abanyamakuru, ariko ntabwo yakambaye.

Perezida Trump ari mu rugamba rutoroshye rwo gushaka kongera gutorwa kuri manda ya kabiri - ari nayo ya nyuma yemewe - mu matora yo mu kwezi kwa cumi na kumwe uyu mwaka, ahatanye Joe Biden wo mu ishyaka ry'abademokarate. Amakusanyabitekerezo agaragaza ko Bwana Biden atazamworohera muri ayo matora.

Ejo ku wa kabiri, Bwana Biden yashinje Bwana Trump ko akazi ko guhangana n'iki cyorezo kamunaniye, agashyira Abanyamerika mu kaga. Uyu wahoze ari Visi Perezida yagize ati: "Yarabatereranye, yatereranye iki gihugu".

Src:bcc,cnbc 






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND