Airtel Rwanda
Kigali

Bwa mbere Knowless na King James bagiye gukorana indirimbo

Yanditswe na: Janvier Iyamuremye
Taliki:15/07/2020 14:44
0

Umuhanzikazi Butera Knowless n'umuhanzi King James bagiye gukorana indirimbo nyuma y'imyaka irenga 10 bombi bari mu muziki Nyarwanda.



Uretse indirimbo z’ibigo bitandukanye King James na Knowless baririmbyemo nta yindi ndirimbo irasohoka y’aba bahanzi bombi barushanwa imyaka bamaze mu muziki.

Iminsi ine irashize hasohotse ifoto y’aba bombi begamiye urukuta rwanditsweho inzu ifasha abahanzi mu bya muzika yitwa Kina Music. Ku maso baracyeye! Buri umwe yifotoje mu buryo bumunogeye kandi bumworoheye bujyanishije n’ibimenyetso by’umubiri we.

Butera Knowless yanditse kuri Instagram agaragaza ko hari ikintu gishya ari gutegurira abafana be n’abakunzi b’umuziki muri rusange. INYARWANDA ifite amakuru avuga ko King James na Knowless batangiye umushinga wo gukorana indirimbo ivuga ku rukundo ndetse ko iri hafi kurangira.

Iyi izaba ariyo ndirimbo ya mbere aba bahanzi bombi batwaye Primus Guma Guma Super Stars bazaba bakoranye. Knowless na King James basanzwe bafite indirimbo bahuriyemo zirimo “Agaciro kanjye” bakoranye n’abandi bahanzi barimo Meddy, The Ben, Patient Bizimana na Israel Mbonyi.

Iyi ndirimbo ya Knowless na King James izakorerwa muri Kina Music, umuhanzi King James yahozemo ariko akaza kuvamo. Kina Music niyo yahinduriye amateka y’umuziki wa Butera Knowless dore ko yamufashije gukora Album guhera ku ya kabiri kugera kuya Gatanu yitegura gusohora.

Ruhumuriza James uzwi kandi nka King James yatangiye gukora umuziki ahagana mu 2006. Mu 2011 yabaye umuhanzi mwiza w’umwaka mu bihembo bya Salax Awards, mu 2012 yegukana irushanwa rya Primus Guma Guma Super Stars.

Mu bihe bitandukanye yasohoye indirimbo zakunzwe mu buryo bukomeye kugeza kuri “Poupette” aherutse gusohora. Azwi cyane mu ndirimbo nka “Ndagukunda”, “Nta mahitamo”, “Birandenga”, “Narashize” n’izindi.

Butera Knowless yatangiye umuziki mu mpera z’umwaka wa 2010; bivuze ko yinjiye mu rugendo rw’umuziki King James amazemo hafi imyaka ine yaratangiye kumenyakana. Mu 2013 yatwaye Salax Awards nk’umuhanzikazi mwiza w’umugore.

Uyu muhanzikazi washyize imbere injyana ya R&B mu 2015 yabaye uwa mbere w’igitsinagore wegukanye Primus Guma Guma Super Stars. Knowless yakunzwe cyane mu ndirimbo nka “Komeza”, “Nkoraho”, “Byarakomeye”, “Sinzakwibagirwa” n’izindi ukageza ku ndirimbo “Nyigisha” aherutse gusohora.

King James na Butera Knowless bagiye gukorana indirimbo nyuma y'imyaka irenga 10






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND