Ikipe ya Manchester City yatsinze urubanza rw’ubujurire, nyuma yo kujuririra ibihano yari yafatiwe na ‘UEFA’ byo kumara imyaka ibiri idakina amarushanwa ategurwa ‘UEFA’ arimo na Champions League nkuko urukiko rwa siporo ku Isi ‘CAS’ rwabitangaje kuri uyu wa Mbere tariki 13 Nyakanga 2020.
Ku wa 14 Gashyantare 2020, nibwo byatangajwe ko Manchester City yahanishijwe imyaka 2 idakina amarushanwa ya UEFA ndetse ikanatanga miliyoni 30 z’amayero kubera kwica amabwiriza agenga igura n’igurisha ry’abakinnyi ku Isi, ‘Financial Fair play’.
Manchester City yashinjwaga kugura abakinnyi benshi uko yishakiye ntigire abo igurisha ndetse no kubesha ibijyanye n’amafaranga ihabwa n’abaterankunga bayo no kwanga korohereza UEFA mu iperereza.
Ubwo bivuze ko Manchester City yashinjwaga gukoresha amafaranga menshi kuruta ayo yinjije hagati y’umwaka wa 2012 n’uwa 2016, ibifashijwemo n’abaherwe bayo bakomoka muri Leta zunze ubumwe z’abarabu.
Manchester City ntiyanyuzwe n’umwanzuro wa UEFA wayikumiraga mu marushanwa itegura mu gihe cy’imyaka ibiri iri imbere, ihita ijurira muri CAS.
Nyuma yuko uru rukiko rushinzwe gukemura imanza za Siporo ku Isi rusuzumye ubujurire bw’iyi kipe itozwa na Pep guardiola, rwanzuye ko ibihano yari yafatiwe na UEFA biteshejwe agaciro ahubwo igomba kwishyura miliyoni 10 z’amapawundi gusa.
CAS yavuze ko ibihano byahawe Manchester binyuranyije n’amategeko ya CFCB (UEFA’S Club Financial Control Body). Manchester City yahise ishyira hanze itangazo ryo kwishimira ko yagarutse muri aya marushanwa yo ku mugabane w’i Burayi.
Manchester City iracyari muri UEFA Champions League y’uyu mwaka w’imikino wa 2019/20, aho izakina na Real Madrid mu mukino wo kwishyura wa 1/8 uzaba mu ntangiriro za Kamena. Umukino ubanza wabereye muri Espagne muri mpera za Gashyantare, warangiye Manchester City itsinze ibitego 2-1.
Kuri ubu, City iri ku mwanya wa kabiri muri Premier League, nta gihindutse ikaba izakina UEFA Champions League y’umwaka utaha w’imikino.
Eng
RSS 
TANGA IGITECYEREZO