RFL
Kigali

Brazil: Perezida Jairo Bolsonaro yasanganwe ubwandu bwa COVID-19

Yanditswe na: Christian Mukama
Taliki:8/07/2020 6:18
0


Kuri uyu wa kabiri ni bwo perezida wa Brazil, Jair Bolsonaro, yatangaje ko yanduye COVID-19. Kuva tariki ya mbere Mutarama 2019, Bolsonaro yabaye perezida wa Brazil wa 38. Kuva icyorezo cya Corona Virus, yagiye agaragaza intege nke mu bijyanye na gahunda yo guhangana na COVID-19 ahubwo agashyira imbere ibijyanye n’ubukungu.



Ubwo yagiraga ikiganiro n’itsinda ry’abanyamakuru ryari riteraniye iwe, perezida Jair Bolsonaro w’imyaka 65 yatangaje ko ibipimo byagaragaje ko yanduye COVID-19. Yakomeje avuga ko agaragaza bimwe mu bimenyetso by’iyi ndwara harimo no kugira umuriro mwinshi. Mu magambo ye bwite yatangaje ko nta mpamvu yo kugira ubwoba ko aho atari ho ubuzima burangirira.

Bolsonaro yagiye agenda biguruntege muri gahunda yo kurwanya icyorezo cya Corona Virus kugeza naho ibijyanye no gusiga metero n’igice hagati y’abantu atabikozwaga kimwe no kwambara agapfuka munwa. Ibijyanye no guhashya iki cyorezo byagiye bituma atavuga rumwe n’abaminisiteri b’ubuzima muri iki gihugu dore ko babiri bamaze kuva ku mirimo yabo kubera kutumvikana na we ku myanzuro imwe n’imwe. Abo ba minisiteri ni Luiz Enrique Mandetta na Nelson Teich.

Brazil magingo aya ni cyo gihugu cya kabiri muri Amerika kizahajwe n’iki cyorezo nyuma ya Leta Zunze Ubumwe z’Amerika. Ubu abagera ku 67000 bamaze kwicwa n’iki cyorezo na ho abarenga miriyoni imwe n’igice bamaze kwandura iyi ndwara.

Bolsonaro ntiyigeze ashyigikira gahunda yo gufunga ubucuruzi kimwe n’ahantu abantu bahurira. Impamvu nyamukuru nuko atifuzaga ko ubukungu buhungabanywa n’ingamba zo kurwanya COVID-19. Indi mpamvu kwari ukwanga ko ubukerarugendo muri iki gihugu bwasubira inyuma. Imibare dukesha ishami ry’Umuryango w’Abibumbye ryita ku bukerarugendo rivuga ko muri 2017, Brazil yinjije agera kuri miriyari $6 . 






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND