Airtel Rwanda
Kigali

Claude Muhawenimana na Mike Runigababisha bahagaritswe na Rayon Sports

Yanditswe na: SAFARI Garcon
Taliki:6/07/2020 10:18
0

Claude Muhawenimana wari ukuriye abafana ba Rayon Sports na Mike Runigababisha usanzwe akuriye ihuriro rya za Fan Clubs za Rayon Sports (Fan Base) bahagaritswe igihe cy’umwaka batitabira ibikorwa byose bya za Fan clubs za Rayon Sports, kubera amagambo abiba amacakubiri mu bafana batangaje.



Tariki 24 Kamena 2020 ni bwo aba bombi batumijweho n'akanama gashinzwe imyitwarire mu ihuriro rya za Fan clubs za Rayo Sports ngo bisobanure ku myitwarire itari myiza yabaranze mu minsi ishize, mu bibazo iyi kipe yari irimo bishingiye mu buyobozi.

Aba bombi batumijwe kuri ibi bikurikira:

1. Kwigomeka ku buyobozi bwa Rayon Sports ugaragara hose usebya unakangurira abafana bose bayo kubwanga no kuburwanya ku mbuga nkoranyambaga uhuriraho n’abandi bafana, itangazamakuru ndetse n’izindi nzira zitandukanye.

2. Gucamo abafana n’abanyamuryango ibice hashingiwe ku kubakangurira kwanga komite ya Rayon Sports Fc ku mbuga nkoranyambaga uhuriraho n’abandi bafana, itangazamakuru ndetse n’izindi nzira zitandukanye.

3. Kutubahiriza umurongo ngenderwaho watanzwe n’inzego za Leta zibishinzwe (RGB), zerekanye ubuyobozi bwemewe bw’ikipe wowe ukaba ukigaragara ku mbuga nkoranyambaga uhuriraho n’abandi bafana, itangazamakuru ndetse n’izindi nzira zitandukanye.

Mu ibaruwa bandikiwe n’iyi komisiyo, Inyarwanda ifitiye kopi, iragira iti:

Nyuma y’uko iyi komisiyo igutumiye ukayitaba kuwa 24/06/2020 maze ibi birego byose ukabihakana uvuga ko atari amakosa ahubwo ariwo murongo wahisemo, tukwandikiye tukumenyesha imyanzuro yafashwe na komisiyo ya discipline ya Fan Base ya Rayon Sports kuri aya makosa yose uregwa,

komisiyo yariherereye ngo isuzume ubwiregure bwawe isanga nubwo uhakana ibyo uregwa byose utarabashije kuvuguruza ibimenyetso bitandukanye yakweretse by’amakosa wakoze nkuko twayasobanuye haruguru, bityo komisiyo yagufatiye imyanzuro ikurikira:

1. Guhagarikwa mu bikorwa byose bya Fan clubs za Rayon Sports mu gihe cy’umwaka umwe.

2. Guhita uhagarika ibikorwa n’imyitwarire yose yo kwigomeka ku buyobozi bw’ikipe ya Rayon Sports no kubwangisha abafana n’abanyamuryango bayo.

3. Kukumenyesha ko nibigaragara ko uri mu isubiracyaha iyi komisiyo isabye inzego zibishinzwe z’ikipe kuzahita uhagarikwa burundu nta yandi mananiza.

4. Kukumenyesha ko nutishimira iki cyemezo ushobora kukijuririra muri Komisiyo nkemurampaka y’umuryango wa Rayon Sports mu gihe kitarenze iminsi irindwi kuva igihe iyi myanzuro itangarijwe.

Tugushimiye uko ubyakiriye

Abandi bahagaritswe ni Ahishakiye Phias usanzwe ari umuyobozi wungirije wa March Generation na Nsangabandi Erneste usanzwe ari Perezida wa Fan club ya Gicumbi.

Claude Muhawenimana na Mike Runigababisha mu minsi ishize bumvikanye mu itangazamakuru cyane basaba umuyobozi wa Rayon Sports kwegura kuko nta ntabushobozi bamubonagamo bwo kuyobora iyi kipe.

 

Mike Runigababisha yari ahagarariye ihuriro ry'abafana ba Rayon Sports

Muhawenimana yari ahagarariye abafana ba Rayon Sports





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND