RFL
Kigali

COVID-19: Amakuru avugwa kuri iyi ndwara y’ icyorezo mu Isi

Yanditswe na: Muhawenimana Faridi
Taliki:13/06/2020 13:32
0

U Bushinwa bwaturutsemo iki cyorezo bwagaragaje ko bufite impungenge z’ uko bwahura n’ igice cya kabiri cy’ iki cyorezo, ibyo byatumye amasoko amwe afungwa. Naho mu Brazil ikaba yabaye Igihugu cyagize abishwe n’ icyorezo benshi inyuma y’ Amerika.



U Bushinwa bwafunze amwe mu masoko rusange hirindwa covid-19

Inzego z’ ubuyobozi muri Beijing zanzuye ko haba hafunzwe by’ agateganyo isoko rusange nyuma y’ uko Komisiyo y’ Igihugu Ishinzwe Ubuzima muri iki gihugu itangaje ko habonetse abarwayi 6 banduriye imbere mu gihugu—mu mujyi w’ u Bushinwa.

Uko byatangajwe n’ ibinyamakuru byo mu Bushinwa, byavuzwe ko babiri mu banduye bari basuye isoko rusange rya Xinfadi. Inzego z’ ubuyobozi, zikaba zahise zitangira ibikorwa byo gupima abakozi bose bakora muri iryo soko.

Byongeye kandi, n’ isoko rigurishirizwamo ibikomoka mu mazi, Jingshen, naryo ryabaye rifunzwe. 

Ibiri muri aya masoko byose biteganijwe ko nabyo bizapimwa harebwa ko bitandujwe. Ndetse n’ amasoko yose acuruza ibyo kurya mu mujyi wa Beijing.

Ejo hashize (ku wagatanu), nibwo u Bushinwa bwari butangaje abantu banduye covid-19—banduriye imbere mugihugu—nyuma y’ ibyumweru birenga 7.

U Bufaransa burafungura imipaka muri Nyakanga

Tariki ya mbere y’ ukwezi kwa karindwi (Nyakanga), u Bufaransa burateganya gufungurira imipaka ibihugu by’ amahanga uretse ibiri mu gace kazwi nka Schengen.

Byatangajwe na Minisitiri w’ububanyi n’ amahanga, Jean-Yves Le Drain, ndetse n’ Ushinzwe iby’ imbere mu gihugu, Christophe Castaner. Bemeje ko gufungura imipaka y’ Igihugu ko ari ukwemeranya n’ ibindi bihugu bigize Umuryango w’ Ubumwe bw’ Uburayi ku kifuzo cyo gufungurira imipaka ibihugu biri muri Balkans.

Aba baminisitiri bombi kandi, banamaze amakenga ibihugu biri muri Schengen, ko nabyo bizaba byafunguriwe imipaka muri Kamena, tariki 15.

Afurika y’ Epfo ikomeje kwibasirwa na covid-19 bikomeye

Ku wagata (ejo hashize), Afurika y’ Epfo yatangaje umubare uri hejuru w’ abanduye covid-19. Mu munsi umwe gusa, hari habonetse abanduye 3,359.

Amakuru yatangajwe na minisiteri y’ Ubuzima, agaragaza ko iki gihugu kimaze kugira abanduye bari hejuru y’ ibihumbi 61.

Somalia: Al-Shabab yashinze aho bazajya bavurira abanduye covid-19

Uyu mutwe uboneka muri Somalia (w’ abihebe), watangaje ko washinze ahazajya havurirwa abantu banduye covid-19, bitewe n’ uko iyi ndwara y’ icyorezo iteje impungenge.

Agatsinda/komite y’ uyu mutwe ishinzwe kurwanya ndetse no kuvura covid-19, yatangaje ko yafunguye ahazajya havurirwa abanduye. Banatanze aho iyo santere iherereye, ko ari Jilib, mu birometero 380 mu majyepfo y’ umujyi wa Mogadishu. Byose, byanyuze mu kiganiro kuri radiyo Andalus.

Agapfukamunwa bigaragazwa ko kagabanyije ubwandu bwa covid-19 ku buryo bugaragara.

Gutegeka abantu baherereye ahiganje icyorezo—Covid-19—byafashije mu kugabanya no kurinda ibihumbi by’ ubwandu bushya bw’ abantu. Ibi bigaragazwa n’ ubushakashatsi bushya bwakozwe.

Ikoreshwa ry’ udupfukamunwa (kutwambara) bigaragazwa ko bifite umumaro uhambaye mu guhangana na covid-19, kurusha ingamba zindi zirimo guhana intera hagati y’ abantu, na guma murugo.

Ubu bushakshatsi bwerekana ko ubu buryo bwonyine bwo kwirinda (kwambara agapfukamunwa) bwagabanyije imibare y’ ubwandu bushya. Imibare yerekana ko mu Butariya hagabanutse 78,000 mu mezi ya Mata tariki 6 kugeza Gicurasi tariki 9.

Bakomeza berekana ko mu mujyi wa New York mu mezi ya Mata tariki 17 kugera Gicurasi tariki 9, agapfukamunwa kagabanyije ubwandu bw’ abagera ku 66,000.

Brazil yabaye Igihugu cya kabiri gifite abantu benshi bwishwe na covid-19

Indwara y’ icyorezo ya covid-19 ikomejwe gutwara Ubuzima bw’ abatari bakeya ku isi. Muri Brazil, ntabwo borohewe.

Imibare y’ abishwe na covid-19 muri iki gihugu yamaze kurenga u Bwongereza, ubu Brazil ikaba iri ku mwanya wa kabiri, aho ikurikira Leta Zunze Ubumwe za Amerika.

Ubu, abanduye muri Brazil bari hejuru y’ ibihumbi 800. Ejo, minisiteri y’ ubuzima yatangaje ko habonetse abanduye bashya mu masaha 24 bagera ku 25,982, ndetse abagera kuri 909 bitaba Imana.

Icyorezo cyumvukanye mu Isi kuva mu mpera z’ umwaka ushize (2019), bwa mbere mu Bushinwa mu mujyi wa Wuhan, ubu abamaze gutangazwa banduye bari kuri miliyoni 7.7. muri abo, 428,373 bamaze kwitaba Imana, naho miliyoni 3,967,856 barakize.

Src: Aljazeera, worldometer  







TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND