RFL
Kigali

Dumba Star na Lil Danger bikomye ibyamamare muri Hip Hop mu ndirimbo bise 'Ndinda abo bana'-YUMVE

Yanditswe na: Kwizera jean de Dieu
Taliki:11/06/2020 11:46
0

Mu ndirimbo bise “Ndinda abo bana” Abaraperi babiri Lil Danger na Dumba Star bikomye ibyamamare mu njyana ya Hip Hop mu Rwanda barimo Jay Polly, Riderman, P FLA, Green P babashinja kujarajara mu njyana bakora, ibyatumye rubanda bakura icyizere kuri iyi njyana bise ko 'yoza roho'.



'Ndinda abo bana' ni indirimbo irimo amagambo akakaye yakwitwa ayo gushoza intambara kuri bimwe mu bikomerezwa bya Hip Hop mu Rwanda, initsa kandi ku cyakorwa kugira ngo iyi njyana isubirane ikamba ryo kuvugira abakene nk’uko bivugwa n’aba baraperi batarahamya izina ryabo muri muzika Nyarwanda.

Dumba Star na Lil Danger ntibiyumvisha ukuntu umuntu ukora Hip Hop y’umwimerere ahindukira agakora za Afrobeat, R&B ngo ari gushaka abafana mu njyana z’inzaduka. Aba basore batangarije Inyarwanda ko kuri bo bene uwo muntu bamufata nk’umufirisitiya ukwiriye kumesa kamwe akagaruka ku gicumbi cya Hip Hop cyangwa akishora muri izo njyana zitaka bise ko zitaka abakobwa beza.

Dumba Star na Lil Danger bakomeje gutuma benshi bibaza niba barakoze itsinda bitewe n'uburyo bakomeje gufatanya mu ndirimbo nyinshi

Bamwe mu bakora Hip Hop bakayivanga n’izindi njyana bavuga ko baba bashaka isoko kuko muri Hip Hop nta mugati urimo, Lil Danger we siko abibona ngo kuko iyo ufite abantu n’ibintu ubibona.

Ati“Si ukuvuga ko injyana ya Hip Hop itinjiza kuko iyo urebye mu bitaramo usanga abaraperi bafite abafana benshi kurusha bariya bahogoza, ikibazo kiri mu itangazamakuru ryacu mu Rwanda usanga badaha umwanya Hip Hop ku buryo bungana na ziriya njyana, abanyamakuru usanga bagenda bumvisha Rubanda ko turi abanywatabi, ibirara n’ibindi,.. ni cyo kibazo tugira naho iyo ufite abantu ntiwabura ibintu“.

Iyi ndirimbo “Ndinda abo bana” aba bahanzi bavuga ko bagiye gutegura amashusho yayo ikazakurikirwa n’indi bari gukora bise “Isambaza” izajya hanze mu minsi ya vuba.

Dumba Star yizera ko Hip Hop izasubirana ikuzo nubwo ngo bigoye, yizera ko bizava mu gukora cyane kw'abayikora bagakora umuziki bafite n'ibindi bibinjiriza aho kwitwa uko batari

Lil Danger yemeza ko gusubira kuri gahunda kwa Hip Hop bizava mu biganza byabo

UMVA HANO NDINDA ABO BANA YA DUMBA STAR NA LIL DANGER







TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND