Gasogi United yasinyishije myugariro ukinira ikipe y'igihugu ya Congo Kinshasa

Beya Beya yari mu Ikipe y’Igihugu ya RDC y’Abatarengeje imyaka 23, yasezereye u Rwanda mu 2018, yakinnye kandi umukino wa gicuti Amavubi y’u Rwanda yatsinzemo Les Léopards ya RDC ibitego 3-2 muri Nzeri 2019 i Kinshasa.

Nyuma yo gusinyisha rutahizamu Iradukunda Bertrand wakiniraga ikipe ya Mukura VS, bakanongerera amasezerano abakinnyi babo batandukanye barimo Heron Scarla, Aimable n’abandi,  iyi kipe yasinyishije myugariro  Beya Beya Hervé wari usanzwe ukinira ikipe ya AS Maniema yo muri Repubulika iharanira Demokarasi ya Congo.

Herve Beya Beya afite imyaka 21 kuko yavutse taliki 31 werurwe 1999 avukira muri Repulika iharanira Demokarasi ya Kongo akaba akinisha cyane ukuguru kw'iburyo. Akina mu mutima w'ubwugarizi, akaba aje gufatanya n'abandi basanzwe kuri uyu mwanya barimo Kwizera Aimable, Kazindu Bahti Guy na Twagirimana Fulgence.

Beya Beya Hervé abaye umukinnyi wa kabiri mushya muri Gasogi United nyuma ya Iradukunda Bertrand wavuye muri Mukura mu minsi ishize, iyi kipe iheruka no kongerera amasezerano y’imyaka ibiri umunya-Liberia Herron Berrian Scalra ukina mu kibuga hagati, na myugariro Aimable usanzwe muri iyi kipe.

Mu mwaka wayo wa mbere mu cyiciro cya mbere, Gasogi Unted yari ku mwanya wa Cyenda, mu gihe shampiyona yahagarikwaga habura imikino irindwi.

Ubutumwa Gasogi United yashyize ku rukuta rwayo rwa Twitter