Wa muti Madagascar ivuga ko uvura Coronavirus wakiriwe na Nigeria n'ubwo OMS itarawemeza

Bwana, Buhari yakiriye umuti mucye wo kugerageza, akaba yawuzaniwe na Perezida Umaro Sissoco Embaló wa Guinea Bissau, kimwe mu bihugu byawusabye Madagascar ngo kiwifashishe mu kuvura abarwayi ba Covid-19. Bwana Buhari ariko avuga ko uyu muti batagiye guhita bawukoresha muri iki gihugu gituwe cyane kurusha ibindi muri Afurika.

Yatangaje ko azabanza akumva ibivugwa n'abashinzwe igenzura ry'imiti mbere yo kwemera ko hari umuti mushya cyangwa uwa gakondo ukoreshwa nk'uko umunyamakuru wa BBC muri Nigeria abivuga. Muri Nigeria,  leta ivuga ko abantu 5,450 bamaze kwandura coronavirus muri bo 171 yarabishe naho1,320 barayikize.

Uyu muti, ukorerwa muri Madagascar mu cyatsi kitwa Artemisia kivangwa n'ibindi bimera byaho, umaze gutumizwa n'ibindi bihugu birimo Niger, Tanzania na Liberia. Ishami ry'Umuryango w'Abibumbye ryita ku buzima OMS/WHO ntiriremeza ko uyu muti uvura Covid-19. Gusa OMS ivuga ko iri gukorana na leta ya Madagascar mu gusuzuma neza niba koko uyu muti uvura iki cyorezo.

Inkuru dukesha BBC ikomeza ivuga ko Perezida Umaro Embaló washyiriye umuti mugenzi we Buhari, yatsinze amatora mu kwa 12 umwaka ushize wa 2019 muri Guinea Bissau, yabanje kwangwa n'abagize inteko ishinga amategeko ariko mu kwezi kwa kabiri uyu mwaka ashyikirizwa ubutegetsi.