RFL
Kigali

Coronavirus: Madagascar iherutse gukora umuti utaremezwa na OMS yatangaje ko igiye kugerageza n'urukingo

Yanditswe na: Eric Misigaro
Taliki:4/05/2020 21:09
0

Umuti wakozwe na Madagascar wavanwe mu giti kirwa Artemisia gusa magingo aya, ntabwo uremezwa nubwo hari ibihugu byatangiye kuwugura. Andry Rajoelina uyobora Madagascar yatangaje ko n'ubwo uyu muti banze kuwemeza awizeye neza ndetse ko yamaze kuvugana n’inzobere zo muri Amerika zizamufasha gukora n’urukingo rw'iki cyorezo.



Magingo aya, isi yose iri ku rugamba ihanganyemo n’icyorezo cya Covid-19. Kubera kubura amahitamo ndetse no kutizerana hari abavumbura imiti bakaza bavuga ko ivura ariko ishami ry’Umuryango w'Abibumbye OMS/WHO nta rukingo cyangwa umuti ryari ryemeza.

Kuwa 21 Werurwe 2020 ni bwo umuyobozi w’igihugu cya Madagascar yatangeje ko igihugu cye cyavumbuye umuti gakondo uvura Covid-19’ Covid-Organics’ gusa ntabwo yateye iyi ndirimbo ngo yakirizanywe ubwuzu ahubwo benshi bamufashe nk'umutekamitwe.

Uyu muti ushobora kuba ukora hagendewe ku barwayi iki gihugu cyari gifite ndetse n'abamaze gukira dore ko bari kwiyongera. Magingo aya, Madagascar ifite abantu barwaye Covid-19 bagera kuri 149 muri bo abagera ku 99 barakize naho abagera ku 50 baracyarwaye.

Perezida wa Madagascar Andry Rajoelina yavuze ko nyuma yo gukora umuti igihugu cye kigiye gukora igerageza ry’urukingo ndetse ko rizatangira mu Cyumweru gitaha. Yashishikarije kandi abaturage ba Madagascar gutera iki giti cya Artemisia.

Bwana Rajoelina yavuze ko ari kuvugana n'abahanga muri siyansi bo muri Leta Zunze Ubumwe za Amerika bazafasha muri ubwo bushakashatsi bw'urukingo rwa Coronavirus.

Igiti gikorwamo umuti bivugwa ko uvura Covid-19 ariko utaremezwa 

Artemisia ni yo yakozwemo umuti witwa Covid-Organics, Bwana Rajoelina akaba yavuze ko iki gihugu kiri gusaba ishami rya ONU rishinzwe ubuzima ku isi, OMS/WHO, ngo ryemeze uwo muti.

Nk'uko BBC yabitangaje yavuze ko hari itangazo yakiriye ryaturutse kuri WHO, ivuga ko itaremera "uburyo bwo kwivura hakoreshejwe imiti iyo ari yo yose...mu gukingira cyangwa kuvura Covid-19".

Covid-Organics, umuti wakozwe muri Madagascar umaze koherezwa mu bindi bihugu bya Afurika byawutumije birimo Guinea-Bissau na Equatorial Guinea. Perezida John Magufuli wa Tanzania nawe yavuze ko bazohereza indege muri Madagascar ikabazanira kuri uwo muti.

Leta Zunze Ubumwe za Amerika, iheruka kwemeza umuti witwa remdesivir - ubundi wakorewe kuvura Ebola - ko ari umuti wakoreshwa mu kuvura Covid-19. Kugeza ubu, iki cyorezo nta muti wemewe n'urwego rushinzwe ubuzima ku isi uraboneka.

 Src: BCC






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND