RFL
Kigali

Abakanyujijeho muri ruhago ya Cote d’Ivoire nta cyizere na gito bagiriye Drogba mu kuyobora ishyirahamwe ry’umupira w’amaguru

Yanditswe na: SAFARI Garcon
Taliki:27/04/2020 14:10
0

Umunyabigwi ukomoka muri Cote d’Ivoire wamenyekanye mu ikipe ya Chelsea yo mu Bwongereza, Didier Drogba, uri kwiyamamariza kuyobora ishyirahamwe ry’umupira w’amaguru muri iki gihugu ( IFF) ntiyagiriwe icyizere n’ishyirahamwe ry’abakinnyi bakanyujijeho muri iki gihugu kuko nta nota na rimwe yabonye mu banyamurango 14 batoye.



Abakinnyi bakanyujijeho muri iki gihugu bayobowe na Didier Zokola, ntibifuza ko Drogba yayobora ‘IFF’, ni yo mpamvu bahisemo guha amajwi 11 uwo bahanganye unasanzwe ayobora ishyirahamwe ry’umupira w’amaguru muri  iki gihugu, Sory Diabate, mu gihe abanyamuryango batatu bifashe. Drogba nta jwi na rimwe yabonye.

Drogba ufitiwe icyizere n’abaturage ba Cote d’Ivoire, ahanganye na  Sory Diabate usanzwe mu buyobozi bw’iri shyirahamwe, mu gihe umukandida wa gatatu Idriss Diallo usanzwe ari visi-Perezida w’iri shyirahamwe yakuyemo ake karenge ku ikubitiro.

Aya matora yakozwe hifashishijwe uburyo bw’amashusho. Drogba yizeye ko agifite amahirwe menshi yo gutorwa kubera ko abatoza, abakinnyi, abasifuzi ndetse n’abayobozi basanzwe muri iri shyirahamwe ntibaratora.

Didier Drogba ushaka kuyobora ishyirahamwe ry’umupira w’amaguru muri  Cote d’Ivoire ( IFF), arashaka gusimbura Augustin Sidy Diallo umaze imyaka umunani ariyobora.

Didier Drogba wakiniye amakipe nka Marseille yo mu Bufaransa na Chelsea Fc yo mu Bwongereza yagiriyemo ibihe byiza, yasezeye ku mugaragaro gukina umupira w’amaguru mu kwezi kwa 11 mu mwaka wa 2018 ubwo yari agejeje ku myaka 40 y’amavuko.

Mu makipe umunani yose Drogba yakiniye mu buzima bwe yayakiniye imikino 679 ayatsindira ibitego 297, muri ayo makipe yose Chelsea niyo yakiniye imikino myinshi anayitsindira ibitego byinshi kuko mu myaka 10 yayimazemo yayikiniye imikino 381 atsinda ibitego 164.

Mu ikipe y’igihugu ya Cote d’Ivoire Drogba yakinnye imikino 105 atsinda ibitego 65. Akaba ari we rutahizamu w’ibihe byose muri Cote d’Ivoire.


Drogba wabaye kapiteni wa Cote d'Ivoire arahatanira no kuyobora ishyirahamwe ry'umupira w'amaguru muri iki gihugu





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND