Urugendo rw’ukuntu COVID-19 yakwirakwiye Isi ivuye mu Bushinwa ikagera no mu Rwanda

Ku ya 31 Ukuboza 2019: Leta y'u Bushinwa yandikiye Ishami ry'Umuryango w'Abibumbye ryita ku buzima (OMS), ibaruwa igira iti “Mwaramutse, tubandikiye tubamenyesha amakuru y'indwara y'ibicurane byibasiye Intara yacu ya Huwan cyane cyane agace ka Hubei. Turabasaba ko mwazatwoherereza abakozi banyu bagakorana n'abakozi bacu ba Minisiteri y'Ubuzima tukamenya ibyo ari byo".

Ku wa 01 Mutarama 2020: Leta y'u Bushinwa yafunze ihahiro rya Huanan Sea food. Iki gihe abari barwaye iyi ndwara yari ikitwa ibicurane bari 40.  Ku wa 05 Mutarama 2020: Leta y'u Bushinwa yari ikiri mu rujijo cyakora Minisiteri y'ubuzima yaho yahise ivuga ko iyi ndwara ifitanye isano rya hafi n'indi ndwara y'ubuhumekero yigeze gutera iki gihugu ihitana abagera kuri 770, hagati ya 2002-2003.

Ku wa 07 Mutarama 2020: Ishami ry'Umuryango w'Abibumbye ryita ku buzima (OMS) nabo ntacyo bari bakamenye, cyakora bari bamaze kumenya ko iyi ndwara yaba ari imwe mu muryango wa Corona maze bahitamo kuba iyibatije '2019-nCoV’. 

Ku wa 11 Mutarama 2020: Umusaza w'imyaka 61 w'Umushinwa wari utuye hafi ya rya soko twavuze haruguru, yabaye uwa mbere wishwe n'indwara itari yakabonewe izina.

Ku wa 15 Mutarama 2020: Umugore w'umu-Thailande w'imyaka 34 yakuye virus i Huwan aba ayigejeje iwabo. Thailand kiba igihugu cya kabiri nyuma y'u Bushinwa. 

Ku wa 17 Mutarama 2020: Umuyapani yavanye virus i Huwan ayinjirana iwabo. 

Ku wa 18 Mutarama 2020: Leta Zunze Ubumwe za Amerika zarikanze maze batangira gupima buri wese winjiye mu gihugu.  

Kuri uwo munsi undi muntu i Huwan yarapfuye. Kuri iyi tariki kandi mu Bufaransa, Singapore, Malysia, Australia, Koreya y'Epfo, Taiwan na Vietnam byari byinjiriwe n’umwanzi.

Ku wa 20 Mutarama 2020: Abanduye mu Bushinwa babaye 200 noneho iki gihe byari byarenze Huwan byageze no mu Mijyi nka Beijing na Shanghai, hirya mu baturanyi ba hafi nka Hong Kong ubwoba bwari bwose. 

Ku wa 22 Mutarama 2020: Hapfuye 14 umunsi umwe, bose baba babaye 17. Intara ya Huwan yahise ishyirwa mu kato ntawari wemerewe kujyayo cyangwa kuvayo. 

Ku wa 23 Mutarama 2020: Ishami ry'Umuryango w'Abibumbye ryita ku buzima (OMS), ryabonye ko ibintu birimo guhindura isura bavuga ko Isi yugarijwe gusa bari batarabibona nk'ikibazo gikomeye.

Ku wa 24 Mutarama 2020: Imyidagaduro mu Bushinwa yarahagaritswe, imijyi 13 ishyirwa mu kato abapfuye bari bageze kuri 26 abanduye ari 830. 

Ku wa 25 Mutarama 2020: Indi Mijyi itanu yashyizwe mu kato yose iba 18. Iki gihe Miliyoni 58 z'abashinwa zasabwaga kuguma mu ngo zabo.  

Ku wa 26 Mutarama 2020: Abanduye mu Bushinwa bari 2,000 naho abapfuye ari 56. Ku wa 27 Mutarama 2020: Abanduye mu Bushinwa babaye 4,515 naho abapfuye bari106. 

Ku wa 01 Gashyantare 2020: Intimba yari yose, igihugu cyose ari amarira mu Bushinwa kuko umubare w’abapfuye wari ugeze kuri 259 naho abarwayi ari 11,719. Iki gihe kandi imibare yarazamukakaga muri Leta Zunze Ubumwe za Amerika, Singapore, Vietnam, u Buyapani n' u Budage.  

Ku wa 02 Gashyantare 2020: Umu-Phillipine yarapfuye. Ku wa 03 Gashyantare 2020: Hapfuye 57 bose hamwe baba babaye 361 naho abanduye bari 17, 205 mu Bushinwa. 

Ku wa 04 Gashyantare 2020: Umusaza w'imyaka 79 yavanye iyi virus i Huwan ayigeza iwabo mu Bubiligi. Ku Isi yose hari hamaze gupfa abantu 4,27 naho abanduye ari 20,438.  

Ku wa 05 Gashyantare 2020: Leta Zunze Ubumwe za Amerika zakuye abaturage bazo i Huwan ako bari barakererewe. 

Ku wa 06 Gashyantare 2020: Abanduye mu Burayi bari 30.  

Ku wa 07 Gashyantare 2020: Muganga Li Wenliang wari warahereye cyera atakambira u Bushinwa Ishami ry'Umuryango w'Abibumbye ryita ku buzima (OMS) ababwira ko Isi iri kugana ahabi, yarapfuye. Iki gihe ubwandu mu Bushinwa bwari 31,161 abapfuye ari 636.  

Ku wa 09 Gashyantare 2020: Umubare w’abishwe n’iyi virus warenze abigeze kwicwa n’iyindi ndwara y'ubuhumekero hagati ya 2002-2003. Iki gihe bari 811. Iyi tariki Ishami ry'Umuryango w'Abibumbye ryita ku buzima (OMS), ryohereje mu Bushinwa inzobere mu by'ubuvumbuzi bw'ama-virus.  

Ku wa 10 Gashyantare 2020: Perezida w'u Bushinwa Xi Jiping yasuye ibitaro bya Beijing asaba abaturage kutagira ubwoba. Iki gihe abari bamaze gupfa bari 9, 08 naho abanduye ari 40,171.

Ku wa 11 Gashyantare 2020: Iminsi ibiri gusa nyuma y'uko inzobere zavuye mu Ishami ry'Umuryango w'Abibumbye ryita ku buzima (OMS) rigeze mu Bushinwa, bahise bavuga ko iyi ndwara yitwa 'Covid-19.' 

Ku wa 12 Gashyantare 2020: Ubwato bwitwa Diamond Princess Cruise bwageze ku cyambu cya Yokohama mu Buyapani bapimye abo bwari butwaye basanga 175 bararwaye. 

Ku wa 13 Gashyantare 2020: Koreya y'Epfo yatangaje akato keruye.  

Ku wa 14 Gashyantare 2020: Covid-19 yinjiye muri Afrika ihera mu Misiri. Kuri uyu munsi kandi uwa mbere mu Bufaransa yarapfuye. 

Ku wa 17 Gashyantare 2020: Abandi 99 bagaragaye ko barwaye mu Buyapani. Ni bamwe muri bwa bwato twavuze haruguru.  

Ku wa 18 Gashyantare 2020: Igitangaza mu Bushinwa, aho abantu 2, 000 bavuye mu bitaro bakize. Byari ibihe byo gushima Imana. 

Ku wa 19 Gashyantare 2020: Babiri barapfuye muri Iran, Ku wa 20 Gashyantare 2020: Uwa mbere muri Koreya y'Epfo yarapfuye.

Ku wa 21 Gashyantare 2020: Abarwayi mu Bushinwa bari 75, 400. Kuri iyi tariki kandi umugore wo muri Israyeli yagejeje Covid-19 iwabo ayikuye muri bwa bwato. Mu Butaliyani cyane umujyi wa Lambordy wari winjiriwe.  

Ku wa 22 Gashyantare 2020: Abataliyani babiri barapfuye. Koreya y'Epfo itangaza ubwandu bushya bw’abantu 229. Wari umubare munini ku munsi umwe.

Ku wa 24 Gashyantare 2020: Kuwait, Irak, Afaghanistan, Oman Bose bavuze ko bagezwemo na Covid-19. 

Ku wa 26 Gashyantare 2020: Abantu 2, 800 ku Isi bari bamaze gupfa naho 80, 000 barwaye. Ku wa 29 Gashyantare 2020: Quatar ni yo yari itahiwe.

Abantu 813 batangarijwe rimwe muri Koreya y'Epfo ko banduye, bose hamwe baba 3,150 muri iki gihugu. 

Ku wa 02 Werurwe 2020: Ikindi gihugu cy'Afrikaa cyarinjiriwe-Tunisia.

Ku wa 03 Werurwe 2020: Abagera kuri 77 bari bamaze gupfa mu Butaliyani.  

Ku wa 07 Werurwe 2020: U Bushinwa bwari bumaze guhomba 17.2% y’ibyo bwohereza hanze. Iyi tariki umudepite witwa Fatimeh Rahbar wari utaramara n'icyumweru mu Nteko yarapfuye azize Coronavirus.

Ku wa 09 Werurwe 2020: Leta ya Iran yafunguye imfungwa 70, 000 mu rwego rwo kwirinda ikwirakwira rya Covid-19. 

Ku wa 10 Werurwe 2020: Abagera kuri 168 barapfuye mu Butaliyani. Uwa mbere muri Marocco yarapfuye. Republika Iharanira Demokarasi ya Congo (RDC),  nayo iti "Twatewe". 

Ku wa 11 Werurwe 2020: Ishami ry'Umuryango w'Abibumbye ryita ku buzima (OMS), ryabonye ko amazi atari ya yandi bati “Iyi ni 'Pendemic' bisonanura icyorezo ndengakamere cyibasira inyokomuntu aho yaba iri hose.

Ku wa 12 Werurwe 2020: Ku isi abanduye bari 126,000 naho abapfuye bari bageze ku 4, 600. Ku wa 12 Werurwe 2020: Ku isi abanduye bari 126,000 naho abapfuye bari bageze 4, 600.  

Ku wa 14 Werurwe 2020: Umuhinde wari warinjiye mu Rwanda, ku wa 08 Werurwe 2020 avuye mu Mujyi wa Mumbai atagaragaza ikimenyetso nta kimwe yabaye uwa mbere ugejeje Covid-19 mu Rwanda. 

Ubu ni 84 bafite iyo virus, ntawe irahitana kandi amakuru atangazwa na Minisiteri y'Ubuzima avuga ko barimo kugenda bamera neza. 

Ku wa 15 Werurwe 2020: Ibikorwa by'imyidadaguro i New York byarafunzwe. 

Ku wa 19 Werurwe 2020: Iki gihe abari bamaze gupfa mu Butaliyani baruse abo mu Bushinwa, bari 3,405. 

Ku wa 20 Werurwe 2020: Ikindi gitangaza mu Bushinwa, nta bwandu bushya bwabonetse uwo munsi. 

Ku wa 21 Werurwe 2020: Uburayi bwakuye Aziya ku mwanya wa mbere w'umugabane wibasiwe. 

Ku wa 22 Werurwe 2020: Abari bamaze gupfa ku Isi bari 13,000 abarwayi ari 311,000.  

Ku wa 23 Werurwe 2020: Abagera kuri 602 bapfiriye umunsi umwe mu Butaliyani. Ubwandu muri Leta Zunze Ubumwe za Amerika bwari 3500.  

Ku wa 26 Werurwe 2020: Abanduye ku Isi hose bari 500,000. Icya kabiri cy’abari ku mugane w'i Burayi. 

Ku wa 27 Werurwe 2020: Minisitiri W'intebe w'u Bwongereza, Boris Johnson yatangaje ko yanduye Covid-19 ahita yishyira mu kato.  

Ku wa 30 Werurwe 2020: Leta y’u Bufaransa yavumbuye ikindi kibazo. Ikibazo cy'ihohoterwa ryo mu rugo kubera abantu ari ho bahora maze ihita ivuga ko izajya yishyurira icyumba cya hoteli ugaragaje kurambirwa kuba mu rugo kuko ahohoterwa.

Ku wa 01 Mata 2020: Abantu bagera kuri 860, 000 bararwaye.  Tedros Umuyobozi w'Ishami ry'Umuryango w'Abibumbye ryita ku buzima (OMS), yavuze ko ibi ari byo bihe by'amage Isi ibayemo nyuma y'intambara ya kabiri y'Isi.

Kuri uyu wa 03 Mata 2020: Abanduye Covid-19 ku Isi barenze Miliyoni imwe.