Ikigo kigenzura ibiribwa n’imiti kiravuga ko imiti ya Chloroquine na Azithronycin itaremezwa nk’imiti ivura Coronavirus

Mu itangazo Ikigo gishinzwe kugenzura ibiribwa n’imiti mu Rwanda (Rwanda FDA) cyashyize ahagaragara, riramenyesha abanyarwanda n’abaturarwanda bose ko imiti ya Chloroquine na Azithronycin itaremezwa nk’imiti ivura cyangwa irinda indwara ya Koronavirusi ( COVID-19) mu Rwanda ndetse n’umuryango w’abibumbye witwa ku buzima OMS. Ubushakashatsi ku muti ukwiye ndetse n’urukingo bya Koronavirusi burakomeje kandi ibizavamo muzabimenyeshwa.

Mu Rwanda imwe mu miti yavuzwe hejuri isanzwe ikoreshwa mu kuvura izindi ndwara. Ku bw’ibyo rero, ikoreshwa ry’iyo miti mu buryo itagenewe rirabujijwe kandi imwe muriyo isanzwe itangwa gusa iyo yanditswe na Muganga herekanwe urupapuro mpeshamiti.

Abahanga mu by’imiti barasabwa gukomeza kubahiriza amahame agenga itangwa ry’imiti n’ikoreshwa ryayo. FDA irongera kwibutsa abanyarwanda gukurikiza amabwiriza arimo ku #GumaMurugo n'andi yatanzwe na Guverinoma mu rwego rwo kwirinda ikwirakwizwa rya COVID-19.