RFL
Kigali

Rwanda: Abanduye Coronavirus bamaze kuba 50, nta n'umwe urembye

Yanditswe na: Mupende Gedeon Ndayishimiye
Taliki:26/03/2020 22:11
0


Kuri uyu wa Kane tariki 26/03/2020 mu Rwanda habonetse abantu 9 barwaye COVID-19, biyongereye ku bantu 41 bityo abamaze kwandura bose hamwe akaba ari 50. Minisiteri y'Ubuzima mu Rwanda (MINISANTE) ivuga ko muri aba barwayi bose nta n'umwe urembye urimo.



MINISANTE yatangaje ko muri aba bantu 9, harimo batanu baje mu Rwanda baturutse i Dubai bahita bashyirwa mu kato. Umuntu umwe yaje aturutse muri Leta Zunze Ubumwe za Amerika nawe ashyirwa mu kato. Undi muntu umwe yaje aturutse mu Buholandi, bikaba byaratahuwe ko yahuye n'undi urwaye coronavirus mu Rwanda, ahita ashyirwa mu kato. Abantu babiri bahahuwe ko bahuye n'abandi barwaye iyi ndwara mu Rwanda, nabo bahita bashyirwa mu kato.

Mu itangazo Minisiteri y'Ubuzima yashyize hanze ku mugoroba w'uyu wa Kane yavuze ko benshi muri aba barwayi 50 ba Covid-19 nta bimenyetso by'iyi ndwara bagaragaza. Iri tangazo riragora riti "(...) Abarwayi bose baravurirwa ahantu habugenewe kandi bari koroherwa. Abenshi muri bo ubu nta bimenyetso bya coronavirus bagaragaza. Nta n'umwe urembye. Hanashakishijwe abantu bose bahuye nabo kugira ngo basuzumwe ndetse bitabweho n'inzego z'ubuzima".

MINISANTE yasabye abaturarwanda bose gukomeza kubahiriza amabwiriza y'inzego z'ubuzima mu kwirinda iki cyorezo hitabwaho cyane cyane gukaraba intoki kenshi kandi neza hanubahirizwa intera ya metero imwe (1) hagati y'abantu. Yibukije kandi "Gushyingura kimwe n'andi mahuriro y'abantu benshi yihutirwa ntabwo agomba kurenza abantu icumi (10)".

Ibimenyetso by'iyi ndwara ni; inkorora, guhumeka bigoranye n'umuriro. Umuntu wese ugaragaza ibi bimenyetso, arasabwa kwihutira guhamagara nimero itishyurwa ya 114 cyangwa akipimisha akoresheje telefone ngendanwa akanda *114# maze agakurikiza amabwiriza. Ashobora kandi kohereza ubutumwa bugufi kuri Email: callcenter@rbc.gov.rw cyangwa akoreheza ubutumwa bwa Whatsapp kuri +250788202080.


Itangazo rya Minisiteri y'Ubuzima ryo kuri uyu wa Kane






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND