Airtel Rwanda
Kigali

Uganda: Habonetse umuntu wa mbere wanduye Coronavirus

Yanditswe na: Mupende Gedeon Ndayishimiye
Taliki:22/03/2020 0:23
0

Kuri uyu wa Gatandatu tariki 21/03/2020 ni bwo Uganda yatangaje ko yabonye umuntu wa mbere wanduye icyorezo cya Coronavirus kimaze kugera mu bihugu binyuranye ku Isi harimo n'ibyo mu Karere ka Afrika y'Uburasirazuba ukuyemo u Burundi butarabona umuntu n'umwe wanduye.



Icyorezo cya COVID-19 gihangayikishije Isi aho kimaze gutwara ubuzima bw'abantu barenga ibihumbi 10. Cyatangiriye mu Bushinwa mu mpera za 2019. Magingo aya igihugu kibasiwe cyane n'iki cyorezo ni u Butaliyani aho abanduye bose hamwe ari 53,578 naho abamaze kuhitanywa n'iki cyorezo akaba ari 4,825. Mu Rwanda abantu 17 ni bo bamaze kwandura nk'uko bitangazwa na Minisiteri y'Ubuzima (MINISANTE).

Igihugu cya Uganda cyamaze gutangaza ko cyabonye umuntu wa mbere wanduye icyorezo cya COVID-19 nk'uko byatangajwe na Minisiteri y'Ubuzima muri iki gihugu iyobowe na Dr Jane Ruth Aceng. Umuntu basanzemo iyi ndwara, ni umugabo w'umunya-Uganda w'imyaka 36 y'amavuko, wageze muri Uganda avuye i Dubai kuri uyu wa Gatandatu tariki 21/03/2020 saa munani z'ijoro. Yari afite ibimenyetso birimo umuriro mwinshi cyane (38.7) ndetse adashaka no kurya.

Leta ya Uganda yahise ihagarika ingendo z'indege yaba iziva hanze y'iki gihugu n'iziva mu gihugu imbere zijya hanze yacyo. Uganda ibonye umuntu wa mbere wanduye iki cyorezo mu gihe ikataje mu ngamba zo kurwanya iki cyorezo by'umwihariko uyu wa Gatandatu wari umunsi igihugu cyose cyiriwe mu masengesho yo gutakambira Imana. Corona virus igeze muri Uganda nyuma y'iminsi micye Pastor Robert Kayanja wa Miracle Centre atagaje ko Imana yamubwiye ko iki cyorezo kitazagera muri Uganda.


Uganda yabonye umuntu wa mbere wanduye Coronavirus






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND