RFL
Kigali

Hari kwakirwa indirimbo zihatanira gutsindira ukwezi kwa 3 mu irushanwa 'Culture Empire Talent Support'

Yanditswe na: Mupende Gedeon Ndayishimiye
Taliki:19/03/2020 21:13
0


Abategura irushanwa Culture Empire Talent Support baramenyesha abahanzi bakizamuka ko hari kwakirwa indirimbo zihatanira gutsindira ukwezi kwa Werurwe bikazarangira tariki ya 31/3/2020 ni ukuvuga mu byumweru bibiri gusa biri imbere.



Mu byumweru 2 gusa, igikorwa cyo kwakira indirimbo z'abahanzi bakizamuka bifuza guhatanira ukwezi kwa 3, kumenyekanishirizwa ibihangano byabo ndetse no guhabwa ubundi bufasha nkenerwa mu buhanzi, kiraba kigeze ku musozo. Ni mu marushanwa ngarukakwezi yiswe "Culture Empire Talent Support"; yatangijwe mu ntangiriro za Werurwe 2020 mu rwego rwo gufasha abahanzi bakizamuka.


Clemy Keza 'Marketing Manager' wa Culture Empire

Clemy Keza usanzwe ari umunyamakuru akaba na 'Marketing Manager' wa Culture Empire ari nayo iri gutegura aya marushanwa yabwiye INYARWANDA ko aya marushanwa bayatangije mu rwego rwo gufasha abahanzi bakizamuka kandi bafite impano kuko bazi imvune aba bahanzi bahura nazo.

Yagize ati: "Culture Empire Talent Support" ni amarushanwa twatangije muri "Culture Empire" mu rwego rwo guteza imbere impano z'abahanzi bakiri bato. Twabitekerejeho nyuma yo gusanga abahanzi benshi baba bafite impano ariko ugasanga bibakomerera ndetse bamwe ntibibashobokere kumenyekanisha impano zabo no kuzibyaza umusaruro."

Yakomeje agira ati "Ni amarushanwa azajya aba buri kwezi aho twakira indirimbo nshya z'ukwezi (Audio, video) zigahangana hanyuma itsinze nyirayo ahembwa ibintu binyuranye birimo gukorerwa audio (Niba audio ye ariyo yabaye iy'ukwezi (yatsinze); promotion y'ibihangano bye ndetse n'imyenda. Video yabaye iy'ukwezi, nyirayo ahembwa bitandukanye harimo gukorerwa indi video, promotion ndetse n'imyenda."

Keza Clemy yavuze icyo bateganyije ku bahanzi b'abanyempano batazajya babasha kugira amahirwe y'uko indirimbo yabo ihiga izindi. Ati "Abahanzi bagaragayeho impano ariko batabashije gutsinda (kuko nyine dufata umubare ntarengwa ari we muhanzi w'ukwezi muri audio na video) tubafasha muri promotion no kuba twabahuza na Labels zishobora kubasinyisha gukorana nazo."

Yavuze ko amarushanwa yamaze gutangira ndetse abahanzi benshi bamaze kohereza ibihangano byabo. Ati "Ariko turagira ngo hatagira uzacikanwa avuga ko atabimenye. Ku muhanzi uba yakoreye indirimbo iwacu birumvikana ko we n'ubwo indirimbo itaba yabaye iya mbere mu marushanwa, tumufasha kuyimenyekanisha ndetse tukanamugira inama aba akeneye nk'umuhanzi mu buzima bwa buri munsi."

Yavuze ko nyuma y'amezi 6 batoranyamo umuhanzi w'umuhungu n'umukobwa bahize abandi, bakabasinyisha muri Label ya Culture Empire. Ati "Nyuma y'amezi atandatu abahanzi batsinze barahatana hakazavamo abo dusinyisha muri Label yacu ya Culture Empire (umukobwa n'umuhungu muri buri cyiciro)."

Uburyo ibihangano byoherezwa ni kuri Whatsapp Numero 0788490629, kuri e-mail: cultureempire@gmail.com; Kuri e-mail: clemkeza@gmail.com. Mu kwirinda icyorezo cya coronavirus hirindwa guhuriza hamwe abantu benshi nko kuzana indirimbo kuri Biro yabo, abategura iri rushanwa bahisemo kwakira indirimbo kuri Email na Whatsapp gusa.

Ku rundi ruhande, umuhanzi wifuza gukorera indirimbo muri Culture Empire banamuha ubujyanama, promotion y'ibihangano bye, kuba yagira amahirwe yo gusinya amasezerano n'iyi kompanyi cyangwa bakamushakira Label bakorana.

Kugeza ubu, Culture Empire ifite Umuhanzi umwe gusa ifitanye amasezerano nawe iri gufasha ari we "Marchal Ujeku" akaba n'umwe mu banyamigabane b'iyi kompanyi. Ku bakeneye ibindi bisobanuro bahamagara kuri telefone 0788490629 cyangwa kuri numero itishyurwa ya 6070.


Marchal Ujeku ni we muhanzi rukumbi ufitanye amasezerano na Culture Empire

"Culture Empire" nk'uko izina ribivuga ni Label yaje ije gushyigikira ubuhanzi Gakondo cyangwa bushingiye ku muco. Ibi ariko ntibiyibuza kwakira no gukorana n'abahanzi bose kuko izi neza ko gukorana na bose biri mu nzira imwe yo kubakangurira no kubibutsa kwita ku muco nyarwanda no kuwushingiraho mu buhanzi bwabo.






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND