OMS iraburira Afurika kwitegura ibihe bibi cyane kubera Coronavirus

Abantu 16 ni bo bamaze kwicwa na coronavirus muri Afurika: batandatu mu Misiri, batandatu muri Algeria, babiri muri Maroc, umwe muri Sudan n'umwe muri Burkina Faso.

Afurika ni wo mugabane kugeza ubu utarashegeshwe na coronavirus, ariko impuguke mu by'ubuvuzi zaburiye ko inzego zayo z'ubuzima zisanzwe zifite imikorere icumbagira zishobora kurengerwa ubushobozi byihuse kubera iki cyorezo.

Ibiro ntaramakuru AFP bisubiramo amagambo ya Tedros Adhanom Ghebreyesus, umukuru wa OMS, agira ati:

"Afurika ikwiye gukanguka...mu bindi bihugu, twabonye mu by'ukuri ukuntu iyi virusi ifatana umuvuduko mwinshi nyuma y'igihe runaka iyo hari ikiyitije imbaraga".

Ejo ku wa gatatu, igihugu cya Burkina Faso cyatangaje umuntu wa mbere wo muri Afurika yo munsi y'ubutayu bwa Sahara wishwe na coronavirus.

Ni umugore w'imyaka 62 wari usanzwe anarwaye indwara y'igisukari (diabète).

Abayobozi bavuga ko uwo murwayi yishe ari Rose Marie Compaoré, wari visi-perezida w'inteko ishingamategeko muri icyo gihugu.

Muri Afurika y'Epfo, ejo ku wa gatatu abantu bayanduye bariyongereye bikomeye bagera ku 116, benshi muri bo bakaba ari abantu bari baragiye i Burayi.

Uwo mubare urimo abarwayi 14 bavuye ku kuyanduzanya ko hagati mu gihugu.

Muri aka karere, ubu mu Rwanda hari abantu 11 basanzemo iyi ndwara, Tanzania batanu, Kenya barindwi, DR Congo 14 naho mu Burundi na Uganda iyi ndwara nta muntu barayisangamo.

Src: BBC