RFL
Kigali

Shampiyona y’u Bwongereza ‘Premier League’ yahagaritswe kubera Coronavirus - AMAFOTO

Yanditswe na: SAFARI Garcon
Taliki:13/03/2020 15:39
0


Ishyirahamwe ry’umupira w’amaguru mu Bwongereza ryamaze gusubika amarushanwa y’umupira w’amaguru atandukanye abera imbere mu gihugu mu gihe cy'ibyumweru bitatu ndetse n’imikino ya gicuti u Bwongereza bwateguraga gukina muri uku kwezi, mu rwego rwo kwirinda ikwirakwizwa ry’icyorezo cya Coronavirus cyibasiye abatuye Isi muri iki gihe.



Mu nama y’igitaraganya ishyirahamwe ry’umupira w’amaguru mu Bwongereza ryatumiyemo amakipe yose kuri uyu wa Gatanu, bemeranya ko shampiyona ndetse na EFL bihagarara ibyumweru bitatu n'imikino ya gicuti ikipe y'igihugu yateguraga muri uku kwezi igakurwaho bakabanza bakareba iby'iki cyorezo  mu rwego rwo kwirinda no kurinda abandi.

Uyu mwanzuro uje ukurikira amakuru atari meza yateye ubwoba benshi, nyuma yuko umutoza mukuru wa Arsenal Mikel Arteta ndetse na Rutahizamu wa Chelsea Hudson Odoi bapimwe bagasanga banduye iyi virus, bikaba binavugwa ko hari abakinnyi ba Arsenal bamaze kwandura barimo na kapiteni w’iyi kipe Aubameyang.

Kuri ubu kandi Abakinnyi b’ikipe ya Everton bashyizwe mu kato, nyuma yo gukekwaho ko bashobora kuba baranduye Coronavirus.

Uretse Shampiyona y’u Bwongereza yahagaritswe ibyumweru bitatu idakinwa, n’irushanwa rya EFL( English Football League) nayo yahagaze.

Imikino ya gicuti ikipe y’igihugu y’u Bwongereza ‘THREE LIONS’ yateganyaga gukina muri uku kwezi, harimo umukino n’ikipe y’igihugu y’u Butaliyani ndetse na Denmark ku matariki ya 27 na 31 Werurwe 2020, nayo yakuweho ntizakinwa.

Biteganyijwe ko ibikorwa by'imikino muri iki gihugu bishobora gusubukurwa Tariki 03 Mata 2020.

Ibikorwa bya siporo ku mugabane w’i Burayi muri iki gihe bibangamiwe cyane niki cyorezo kuko bisubikwa umusubirizo ibindi bigakurwaho.

Mu Butaliyani ibikorwa by’imikino byamaze guhagarikwa kugeza tariki ya 3 Mata mu gihe na Shampiyona ya Espagne, La Liga ndetse n’ibikorwa byose by’umupira w’amaguru mu Bufaransa nabyo byahagaritswe.

Imikino ibiri ya Europa League, uwari guhuza Seville na AS Roma n’uwari guhuza Inter Milan na Getafe, kuri uyu wa Kane, yombi yasubitswe kubera Coronavirus mu gihe indi yabereye mu muhezo.

Imikino ibiri ya 1/8 yo kwishyura  muri UEFA Champions League yari kuzakinwa mu cyumweru gitaha, harimo uwa Manchester City na Real Madrid n’uwari guhuza Juventus na Lyon, yombi yasubitswe kuko abakinnyi ba Juventus n’aba Real Madrid bashyizwe mu kato.

Impuzamashyirahamwe y’Umupira w’Amaguru i Burayi, UEFA, yatangaje ko ku wa Kabiri utaha, tariki ya 17 Werurwe 2020, hazaba inama yo kwiga uburyo amarushanwa yayo yakomeza cyangwa agahagarikwa.

Umwe mu myanzuro itegerejwe na benshi ni urebana n’igikombe cy’u Burayi (EURO 2020) cyagombaga kuba mu mpeshyi, gishobora kwimurirwa mu mwaka utaha wa 2021.


Premier League yahagaritswe ibyumweru bitatu


English Football League nayo yahagaritswe


Imikino yose ya Premier League yahagaze ibyumweru bitatu


Shampiyona ihagaze Liverpool ikiyoboye urutonde rwa shampiyona








TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND