Airtel Rwanda
Kigali

Son Heung-min agiye kumara igihe kirekire hanze y’ikibuga adakinira Tottenham - AMAFOTO

Yanditswe na: SAFARI Garcon
Taliki:21/02/2020 12:17
0

Rutahizamu ukomoka muri Korea y’Epfo ukinira ikipe ya Tottenham Hotspurs, Son Heung-min, agiye kumara hanze y’ikibuga ibyumweru byinshi adakina nyuma yo kuvunika ukuboko mu mukino wa shampiyona y’Ubwongereza ikipe ye yatsinze Aston Villa ibitego 3-2 ku Cyumweru.



Uyu musore w’umunya Koreya y'Epfo w'imyaka 27 y'amavuko, azabagwa muri iki cyumweru, ari naho hashobora gutangazwa igihe nyirizina azamara adakina, gusa abacungira hafi bemeza ko uyu mwaka w’imikino ushobora kurangira uyu musore atagarutse mu kibuga.

Bisobanuye ko byanze bikunze atazakina mu mukino wa kimwe cy'umunani (1/8) cy'irushanwa ry'amakipe yabaye aya mbere iwayo mu Burayi bita Champions League, igihe ikipe ye Tottenham izaba ikina na RB Leipzig ku wa gatatu ndetse azanasiba umukino wa Chelsea muri shampiyona ku wa Gatandatu, mu mikino iyi kipe ifite mu minsi ya vuba.

Tottenham kugeza ubu ikina idafite rutahizamu wayo Harry Kane wavunikiye mu mukino wahuje ikipe ye na Southampton mu kwezi kwa mbere, rikaba ari ihurizo rikomeye ku mutoza Mourinho ugiye gukina adafite Moteur ze ebyiri zamutsindiraga ibitego.

Son yatsindiye ikipe ye mu mikino itanu iheruka irimo n'ibitego bibiri yatsinze mu mukino wo ku Cyumweru wabahuje na Aston Villa.

Kuba atazagaragara bivuze ko umunya Brazil w'imyaka 27, Lucas Moura, Umuholandi Steven Bergwijn w'imyaka 22 waguzwe mu kwezi kwa mbere na Troy Parrott wo muri Repubulika ya Irlande w'imyaka 18 ari bo bakinnyi bonyine ba rutahizamu Tottenham isigaye icungiyeho ibitego.

Kugeza kuri ubu Tottenham iri mu rugamba rwo kuzasoza shampiyona mu makipe ane ya mbere, dore ko kuri ubu iri ku mwanya wa Gatanu aho ifite amanota 40, ikaba irushwa na Chelsea ya Kane inota rimwe, ikarushwa na Leicester ya Gatatu amanota 10.


Son yavunitse ukuboko gushobora gutuma amara igihe kirekire hanze y'ikibuga


Son kuri uyu mukino yavunikiyeho yari yatsinze ibitego bibiri



Ni umwe mu bakinnyi bari bafatiye runini Tottenham


Son na Kane bose baravunitse ntibari gukina





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND