Airtel Rwanda
Kigali

Imishinga yapfuye ni iyo bene yo banze gupfira-Bamporiki aganiriza abahatanira kuba Miss Rwanda 2020-AMAFOTO

Yanditswe na: Janvier Iyamuremye
Taliki:14/02/2020 12:38
0

Umunyamabanga wa Leta muri Minisiteri y’Urubyiruko n’Umuco, Hon. Edouard Bamporiki, yasuye abakobwa 20 bari mu mwiherero wa Miss Rwanda 2020, abasaba kwitangira imishinga yabo biyemeje gukora.



Bamporiki yasuye aba bakobwa 20 mu gitondo cy’uyu wa gatanu tariki 14 Gashyantare 2020. Abibutsa ko ba nyampinga bari hagati y’abahari n’abazaza ko imyitwarire y’umuntu ayikomora ku bo akomokaho.

Yavuze ko urubyiruko rufite ikibazo cyo ‘kwemera aho rukomoka kubera imibereho yaho. Ariko bidakuraho amateka ko ariho uva!"

Ngo Obama yaciye mu buzima bukomeye bwo kuba atari azi aho akomoka aje kumenya ko afite inkomoko muri Kenya ntiyabihisha.

Avuga ko Abanyamerika bakunze ibitekerezo bye byo kuba yaremeye aho avuka bituma aba umwizerwa.

Yasabye abakobwa bari mu mwiherero kudacogora ku mishinga yabo n'iyo baba bategukanye ikamba.

Yabasabye kandi kutivanga mu mishinga batahisemo gukoraho ndetse ashimangira ko ari abaranga b'u Rwanda bityo bakwiye kugira uko bitwara bitandukanye n'abayobeye mu bidafite agaciro.

"Mubanze mugere ku rwego rukomeye bibafashe kuranga u Rwanda. Muve mu tuntu tworoshye, muvuge muti uzambona ku gihe, azabona u Rwanda, uzambona mu ishuri rikomeye azabona u Rwanda, uzabona mfite umwanya ukomeye mu mahanga azabona u Rwanda. Muri abaranga b'u Rwanda."

Imishinga yapfuye ni iyo bene yo banze gupfira! Minisitiri Bamporiki yongeye gukomoza kuri iyi ntero ashimangira ko n'u Rwanda ubu uko ruhagaze neza ari uko hari abarwitangiye batizigamye.

Ati" Inkotanyi zitangiye u Rwanda, turemye kuko zarupfiriye."

Yongeyeho ko birebeye mu cyiciro cya ba Nyampinga bandi niba hari utarabashije kugera ku byo yari yariyemeje ari uko atabipfiriye, ati "Gupfira mvuga ni iki? Ni ukwiyemeza uti ibi ngibi ndi gukora ntibikomeye reka mbyigomwe nkore uyu mushinga."

"Niba Abarundi muri aka kanya barangaye, bareke ni bo. Niba Abagande barangaye bareke nibo [...] Perezida Kagame aherutse kuvuga ngo aho abandi bagenda bisanzwe twebwe tugomba kuvuduka. Twiruke mu byacu."

Bamporiki yibukije ba Nyampinga kandi ko imyitwarire yabo nk'urubyiruko ari ingenzi, ababwira ko amafoto bakunze kwifotoza bakwiye kujya babanza kuyatekerezaho. Kuko mu myaka 15 ntibazi abo bazaba ari bo.

Ati "Ushyize ifoto y’ubwambure hanze byerekana ko mu mutwe naho hambaye ubusa!

Ati “Naje kubabwira ko muri abayobozi b’ejo hazaza. mushake aho mwandika iri jambo nyuma y’igihe uzaba akibyibuka azibuka ko nabivuze”.

Bamporiki yasuye aba bakowa nyuma y’uko kuri uyu wa gatatu tariki 12 Gashyantare 2020 basuye Pariki ya Nyungwe bibonera ikiraro cya Canopy Walkway gisurwa na ba mukerarugendo benshi.

Umwe muri aba abakobwa basuye Nyungwe yavuze ko "Icyo bimfasha ndamenya byinshi narushaho kongera mu mushinga wanjye w’ubukerarugendo. Iyo ugiye gikangurira abandi gukora ikintu nawe ugifiteho uko ukizi biragufasha kuko ubabwira ibyo uzi neza."

Aba bakobwa bagiye kumara ibyumweru bibiri bacumbikiwe kuri La Palisse Hotel Nyamata. Igikorwa cya Miss Rwanda kizasozwa tariki 22 Gashyantare 2020 ari bwo hazamenyekana uwegukanye ikamba rya Nyampinga w’u Rwanda 2020 asimbure Nimwiza Meghan ufite irya 2019.

Minisitiri Bamporiki ati "Imishinga yapfuye ni iyo bene yo banze gupfira"


Abakobwa bahatanira kuvamo Miss Rwanda 2020 basabwe kudacogara ku mishinga yabo biyemeje




Abakobwa bahawe umwanya wo kuganira na Minisitiri Bamporiki

Minisitri Bamporiki Edouard yifotozanyije n'abakobwa 20 bahataniye ikamba rya Miss Rwanda 2020

Ku wa Gatatu aba bakobwa basuye Pariki ya Nyungwe


Kanda hano urebe amafoto menshi:

AMAFOTO: Afrifame






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND