Innoss'B ukunzwe mu ndirimbo “Yope” yakoranye na Diamond mu bashobora gutaramira i Kigali

Iki gitaramo kizaba ku wa 28 Gashyantare 2020. Kompanyi ya RG Consult itegura ibitaramo ngaruka kwezi bya Kigali Jazz Junction, kuri uyu wa 19 Mutarama 2020, yamenyesheje abahanzi batatu bashobora kuririmba mu gitaramo cya mbere cy’uyu mwaka wa 2020.

Yasabye abakurikirana ibi bitaramo guhitamo hagati ya Innoss’B, Joeboy wo muri Nigeria ndetse na Stella Mwangi wo muri Kenya. Aba bahanzi bombi bafite amateka yihariye mu muziki aherekezwa n’indirimbo zitandukanye zikomeye bagiye bashyira hanze mu bihe bitandukanye.

Innoss'B wavutse ku wa 05 Gicurasi 1997, ni umunyamuziki ufite igikundiro muri iki gihe abicyesha indirimbo ‘Yope Remix’ yakoranye na Diamond imaze kurebwa n’abarenga Miliyoni 55 ku rubuga rwa Youtube.

Ni umwe mu bahanzi bakiri bato muri Repubulika Iharanira Demokarasi ya Congo ariko bahagaze neza mu kibuga cy’umuziki. Ni umwanditsi w’indirimbo, umuraperi, umubyinnyi wakuriye mu Mujyi wa Goma ashyira imbere injyana ya Afrobeat ndetse na Hip-Hop.

Yakuriye mu muryango w’abanyamuziki kuko nyina yari umuririmbyi mu rusengero mu gihe Ise yari umwe mu baririmbyi n’ababyinnyi b’itsinda ry’abavandimwe rya Maisha Soul.

Ku myaka 12 y’amavuko yegukanye irushanwa rya ‘Vodacom Super Star’ atowe n’abarenga Miliyoni 1.3. Mu 2010 yakoranye indirimbo “Up and away” na Akon, “She likes me” n’umuraperi Navion, “Merci Maman” na Fally Ipupa, “Yope” yasubiyemo yifashije Diamond Platnumz n’izindi.

Joeboy washyizwe mu bashobora gutaramira i Kigali muri Gashyantare, yavutse ku wa 21 Gicurasi 1997, yujuje imyaka 22 y’amavuko. Yavutse yitwa Joseph Akinfenwa Donus akorana n’inzu zireberera inyungu z’abahanzi nka Banku Music n’izindi.

Uyu musore uherutse gusohora Album ‘Love&Night’ ni umwe mu bahataniye ibihembo bya ‘The Headies Award for Next Rated’. Yakunzwe mu ndirimbo nka ‘Bad Girl’ yasohoye mu 2017, ‘Don’t call me back’, ‘All For you’

Joeboy aherutse gusohoka ku rutonde rwa BBC rw’abahanzi bo kwitega mu 2020. Iki kinyamakuru cyavuze ko uyu musore yatangiye guhangwa amaso na benshi abicyesha indirimbo ye yise ‘Baby’ imaze kurebwa n’abarenga Miliyoni 18 ku rubuga rwa Youtube mu gihe cy’amezi icyenda imaze isohotse.

Ni umuhanzi w’umuhanga ufite ijwi ryihariye rimufasha gutanga ubutumwa mu njyana ya Afrobeat na Pop yashyize imbere. Amaze gukorera ibitaramo bikomeye mu bihugu bitandukanye byo muri Afurika ndetse yanaririmbiye mu Bwongereza.

Yavutse ku wa 01 Nzeri 1986, ni umwanditsi w’indirimbo akaba n’umuraperi. Indirimbo ze nyinshi zishingiye ku buzima bwa buri munsi bwo mu gihugu cye. Indirimbo ze kandi zifashijwe muri filime zikomeye nka ‘American Pie Presents” the Naked Mile’, ‘Save the Last Dance 2’ n’izindi.

Yegukanye ibihembo bikomeye mu muziki harimo nka ‘Kasima Awards’, ‘Clops Awards’, ‘Jeermaan Awards’ n’ibindi. We n’umuryango we babaye igihe kinini muri Norvege byanatumye naho ahakura igikundiro mu muziki

Afite indirimbo zatumye akundwa muri Kenya, Senegal, Gambia n’abandi. Mu 2018 yasohoyse indirimbo “No Games” yifashijwe mu kwamamaza telefoni ya Galaxy S9 ya sosiyete ya Samsung.

Uyu mukobwa azwi cyane mu ndirimbo nka ‘Big Girl’, ‘Work’, ‘Take my time’ n’izindi.

Ibitaramo bya Kigali Jazz Junction byaherukaga kuba mu Ugushyingo 2019 aho abanyakigali n’abandi bataramiwe n’umunya-Nigeria w’umunyamerika Jidenna watanze ibyishimo by’ikirenga mu gihe cy’isaka irenga yamaze ku rubyiniro.

Innoss'B wakoranye indirimbo 'Yope' na Diamond afite amanota 14.8%

Joeboy wo muri Nigeria afite amajwi 81.5%

KANDA HANO UREBE INDIRIMBO 'YOPE REMIX' YA INNOSS'B NA DIAMOND PLTANUMZ

">