Abakinnyi 7 b’ikipe y’igihugu ya Eritrea batorokeye i Kampala nyuma y’imikino ya CECAFA

Amakuru y’itoroka ry’aba bakinnyi yemejwe n’ishyirahamwe ry’umupira w’amaguru muri Eritrea, ribinyujije ku rubuga rwabo rwa Twitter, bemeje ko abakinnyi barindwi bari mu ikipe y’igihugu ya Eritrea yitabiriye irushanwa rya CECAFA ryabereye muri Uganda batorotse, bikaba byavumbuwe ubwo bajyaga ku kibuga cy’indege ngo basubire i wabo bakabategereza bakababura.

Abakinnyi 7 ba Eritrea batorotse ni: Isias Abraham, Eyob Girmai, Robel Kidane, Yosief Mebrahtu, Filmon Semere, Abel Ogbay, ndetse na Ismail Jahar.

Mu irushanwa rya CECAFA ryabereye muri Uganda mu minsi micye ishize, ikipe y’igihugu ya Eritrea izwi ku izina rya 'Red Sea Camel' yasoje iri ku mwanya wa kabiri nyuma yo gutsindirwa ku mukino wa nyuma na Uganda yakiriye irushanwa ibitego 3-0, nyuma yo gusezerera Harambee Stars ya Kenya mu mikino ya ½. Ikaba ariyo nshuro ya Mbere Eritrea yari ikoze amateka yo kugera ku mukino wa nyuma muri iri rushanwa.

Iyi si inshuro ya mbere gutoroka kw'abakinnyi bibaye kuri iki gihugu giherereye mu ihembe rya Afurika, kuko n’ubundi mu irushanwa rya CECAFA y’abatarengeje imyaka 20 riheruka kubera mu mujyi wa  JINJA muri Uganda mu kwezi kwa 10/2019, havuzwe abakinnyi baturuka muri iki gihugu batorotse.

Mu mwaka wa 2015, ubwo Eritrea yari mu mikino yo gushaka itike y’igikombe cy’isi cya 2018, abakinnyi b’ikipe y’igihugu ya Eritrea batorokeye muri Botswana, mu myaka itandatu yari yabanje ikipe yose ya Eritrea yanze gusubira mu gihugu cyabo ubwo bari bari mu mikino y’irushanwa rya CECAFA ryari ryabereye muri Kenya.

Abakinnyi barenga 15 b’abanya Eritrea batorokeye mu gihugu cya Uganda mu mwaka wa 2012, ubwo bari bitabiriye irushanwa rya CECAFA Senior Chalenge Cup, nyuma Leta ya Uganda iza kubemerera kuba impunzi.

Abantu benshi bibaza impamvu abantu bakomoka muri bimwe mu bihugu byo mu ihembe rya Afurika  ndetse n’ibihugu bituranye nabyo, iyo babonye amahirwe yo gusohoka mu bihugu byabo batifuza kuhasubira. Gusa ariko abahanga mu bya Politiki mpuzamahanga bavuga ko bataba bahunze inzara ahubwo baba bahunga igitugu ndetse no kubaho baterwa ubwoba no kutabona ubwisanzure, mu bihugu byabo.

Amafoto y'abakinnyi ba Eritrea batorokeye muri Uganda nyuma y'imikino ya CECAFA 2019

Ikipe y'igihugu ya Eritrea yatahukanye umwanya wa kabiri mu irushanwa rya CECAFA 2019