The Ben ku ruhembe rw'abahanzi batanu bamaze kwemezwa kuzaririmba muri East African Party 2020

Abahanzi bazaririmba muri ‘East Africa’s Party 2020’ ni barindwi umunsi ku wundi ‘EAP’ iratangaza umuhanzi wiyongereye ku rutonde. Kuri ubu abamaze gutangazwa ni The Ben, King James, Andy Bumuntu, Riderman na Knowless.

Ni ku nshuro ya 12 igitaramo cya ‘East African Party’ kigiye kubera ku butaka bw’u Rwanda, kuri iyi nshuro cyashyizwe mu nyubako nshya yahariwe kwakira imyidagaduro ya Kigali Arena yubatse iruhande rwa Sitade Amahoro.

Iki gitaramo kizaba kuwa 01 Mutarama 2020, imiryango izafungurwa guhera saa kumi z’umugoroba. Guhera kuwa 20 Ukuboza 2019 kugeza kuwa 31 Ukuboza 2019 amatike yo mu myanya isanzwe ni 3, 000 Frw, mu myanya y’icyubahiro (VIP) ni 10,000 Frw naho muri (VIP) ni 15,000 Frw.

Ku munsi w’igitaramo tariki 01 Mutarama 2020 amatike mu myanya isanzwe ni 5,000 Frw, mu myanya y’icyubahiro (VIP) ni 15,000 Frw naho muri (VIP) ni 20,000 Frw. Buri muhanzi uzaririmba muri iki gitaramo azaririmba mu buryo bwa ‘Live’.

The Ben agiye kuririmba i Kigali nyuma y'uko akoreye igitaramo gikomeye i Dubai, Kenya n'ahandi. Ni umuhanzi nyarwanda mpuzamahanga umaze gukorana indirimbo n'abahanzi bakomeye muri Afurika.

Mugenzi we, Meddy aherutse kwandika kuri Instagram abwira abanya-Kigali kwitega 'igisamagwe'. The Ben yanditse kuri konti ya instagram, avuga ko yishimiye gutumirwa gutaramira ku ivuko. 

Yateguje abafana be kwitegura kwandika amateka mashya kuko azandikwa. Ati “Kigali muriteguye! Nishimiye gutangaza ko mu mpera z’uyu mwaka wa 2019 nzaba ndi kumwe nawe. Mutegure igitabo gishya kuko amateka agiye kongera kwandikwa.”

Umuhanzikazi Butera Jean d'Arc waryubatse mu muziki ku izina rya Knowless, nawe yashyizwe ku rutonde rw'abahanzi bagezweho bazaririmba mu gitaramo ‘East African Party 2020'

Knowless yubatse izina aranarisigasira! Imyaka irenze icumi yunze Ubumwe n'indangururamajwi. Imyaka 29 agejeje yatanze ibyishimo mu bitaramo yakoreye ahantu hakomeye byatumye ashyirwa ku rutonde rw'abahanzi bazafatanya n’abanyarwanda gutangira umwaka mushya wa 2020.

Abarizwa muri 'Label' ya Kina Music yamugize uw'igiciro. Mu bihe bitandukanye yasohoye indirimbo zakunzwe mu buryo bukomeye. Umwibuke mu ndirimbo 'Baramushaka', 'Komeza', 'Ko nashize'...urutonde ni rurerure kugera ku ndirimbo 'Blessed' aherutse gusohora.

Knowless agiye kuririmba muri iki gitaramo nyuma y'uko ahawe impamyabumenyi y'icyiciro cya Gatatu cya Kaminuza.

Mushyoma Joseph (Boubou) wa East Africa’s Promoters (EAP) yabwiye INYARWANDA ko ari igitaramo cy'umwihariko ku banyarwanda bazafashwa kwinjirana akanyamuneza mu mwaka wa 2020. 

Iki gitaramo kizaririmbamo kandi Andy Bumuntu wubakiye ku njyana ya Blues na gakondo. Ni umuhanzi w'umuhanga w'ijwi ryihariye unitegura kumurika Album muri Kanama 2020.

Aririmba mu murage yasigiwe na mukuru we Gaby Umutare ubarizwa muri Australia. Bumuntu anashyize imbere gufasha abakiri bato abigisha muzika.

Riderman wasubitse kumurika Album muri uyu mwaka nawe azaririmba muri iki gitaramo. Ni igisumizi nyine! Mu byivugo n'ubushongore yumvikanisha mu ndirimbo bitumye muri uyu mwaka yinjiza akavagari mu mufuka anifashishwa na kompanyi zikomeye mu bucuruzi.

Iki gitaramo ni umwanya n'amahirwe kuri Riderman yo gushimangira ko yujuje Petit Sitade nk'uko yabiririmbye. Indirimbo ze nka 'Rutenderi', 'Umwana w'umuhanda', 'Inyuguti ya R' zamwaguriye igikundiro aravugwa biratinda kugeza ku ndirimbo 'Nta mvura idahita' aherutse gusohora.

King James umuhanzi w'umunyamitoma wihagazeho! Indirimbo ze zacengeye umubare munini bamukunze kuva ku ndirimbo 'Buhoro buhoro', 'Ganyobwe', ‘Nta mahitamo’...ugakomeza kugera kuri 'Yabigize birebire', ‘Meze neza’ n’izindi umuntu atarondora.

Muri uyu mwaka amaze gukorera amafaranga mu bitaramo bikomeye. Yashimwe n'abayobozi batandukanye biturutse ku ndirimbo 'Igitekerezo' yakoreshejemo umukobwa ufite ubumuga bw'uruhu.

Umuhanzikazi Knowless Butera uherutse gusohora indirimbo 'Blessed' azaririmba muri 'East Africa's Party 2020'

Mugisha Benjamin [The Ben] ni we muhanzi wa mbere watangajwe muri barindwi bazaririmba muri 'East Africa's Party 2020'

Ruhumuriza James wiyise King James, umuhanzi wa kabiri uzaririmba muri 'East Africa's Party 2020'

Andy Bumuntu, umuhanzi w'umunyarwanda wubakiye ku njyana ya Blues na Gakondo nawe ategerejwe muri iki gitaramo 'East Africa's Party 2020'

Umukuru w'Ibusumbizi! Riderman, umuhanzi wa kane uzaririmba muri 'East Africa's Party 2020'

Iki gitaramo cyateguwe inkunga n’uruganda rwa Bralirwa binyuze mu kinyobwa cya ‘Heineken’. Kuwa 22 Ukuboza 2018 nibwo Bralirwa yamuritse ku mugaragaro ikinyobwa cya ‘Heineken’ cyengewe mu Rwanda ndetse mu bihe bitandukanye abanyamahirwe banywa ‘Heineken’ bafashwa kujya kureba imikino ihuza amakipe akomeye ku Isi. Bralirwa yatangiye gukorera mu Rwanda mu 1975. Mu bihe bitandukanye yashyize ku isoko ibinyobwa bikunzwe nka Mutzig, Primus, Trubo, Amstel, Legend n’ibindi binyobwa bidasembuye.

Ni igitaramo kandi cyatewe inkunga na Sosiyete y’Itumanaho ya Airtel Rwanda imaze iminsi muri ‘Promotion’ yise ‘Tera Stori’ aho uhamagara imirongo yose ku giciro gito. Iyi sosiyete kandi yifashishije Meddy yakanguriye abantu gahunda ya #GerayoAmahoro yimirijwe imbere na Polisi y’u Rwanda. Airtel iranitegura gukorera igitaramo gikomeye i Musanze yahurijemo Nsengiyumva Francois ‘Igisupusupu’, Ndimbati n’abandi banyarwenya. Iki gitaramo kizaba kuwa 20 Ukuboza 2019.