Airtel Rwanda
Kigali

AS Kigali irabeshyuza ibivugwa ko iri mu biganiro na Cassa Mbungo Andre

Yanditswe na: SAFARI Garcon
Taliki:16/12/2019 13:03
0

Nyuma y’uko umutoza Cassa Mbungo Andre asezeye muri AFC Leopards yo muri Kenya, byaravuzwe ko ubuyobozi bwa AS Kigali bwatangiye ibiganiro n’uyu mutoza kugira ngo aze gusimbura Eric Nshimiyimana watangiye nabi shampiyona, ariko ubuyobozi bw’iyi kipe bwahakanye ibivugwa bwivuye inyuma bwemeza ko byose ari ibihuha.



AS Kigali ni imwe mu makipe yatangiye nabi umwaka w’imikino wa 2019-2020, byatumye abakinnyi ndetse n’umutoza w’iyi kipe bajya ku gitutu bikanga ko isaha n’isaha bashobora gusezererwa, nyuma yuko umutoza Cassa Mbungo asezeye mu ikipe ya AFC Leopards hasohotse amakuru avuga ko hari bamwe mu bayobozi ba AS Kigali bashobora kuba ari mu biganiro n’uyu mutoza binyuze ku murongo wa telephone.

Amakuru agera kuri inyarwanda.com avuga ko nyuma y’umusaruro mubi ugaragara muri AS Kigali, bashaka gukora impinduka ubwo igice kibanza cya shampiyona kizaba kirangiye nyuma ya tariki 22 Ukuboza 2019. Bimwe mu bivugwa ko bishobora guhinduka harimo umutoza mukuru wa AS Kigali, aho bivugwa ko Eric azatandukana na AS Kigali ikipe igahabwa Cassa Mbungo Andre ndetse bagasezerera bamwe mu bakinnyi bayo, hakagurwa abakinnyi batatu bashya.

Mu gushaka kumenya ukuri ku bivugwa muri AS Kigali, inyarwanda.com yaganiriye n’umunyamabanga akaba n’umuvugizi w’iyi kipe y’umujyi wa Kigali Bwana Gasana Francis, ahakana yivuye inyuma ibivugwa kuri AS Kigali avuga ko nta gahunda bafite yo gusimbuza Eric, avuga ko ari umutoza ufitiwe icyizere uzakomeza kubaka ikipe.

Yagize ati”ibijyanye n’umutoza mushya bivugwa kuri AS Kigali ni ibihuha, uwo Cassa bavuga nge sindanamubona!!! Ntangazwa no kumva hari abavuga ko ari mu biganiro n’ubuyobozi bwa AS Kigali, iyo gahunda twe ntayo dufite, Eric afitiwe icyizere muri AS Kigali kandi afitanye amasezerano n’iyi kipe, kuruhande rwacu umusaruro si mwiza cyane kandi si na mubi, ntekereza ko igihe kizagera ibintu bikajya mu buryo”.

Uyu muyobozi kandi yavuze kuri gahunda iyi kipe ifite yo kongera imbaraga mu busatirizi bwayo kugira ngo umusaruro mwiza bashaka uzagerweho.

“Mu gice cya kabiri cya shampiyona turifuza kuzaba twabonye ba rutahizamu babiri bashya kuko niho dufite ikibazo cyane, kuko murabizi ko na Pierrot azaba yagarutse mu kibuga hagati, tuzaba dufite ikipe nziza kandi ntekereza ko umusaruro mwiza uzaboneka”.

Mu mikino 14 imaze gukinwa muri shampiyona y’u Rwanda mu mwaka w’imikino wa 2019-2020, AS Kigali iri ku mwanya wa 11 n’amanota 14, ikaba yaratsinze imikino ibiri inganya imikino umunani, itsindwa imikino ine.

Ku munsi uzoza igice kibanza cya shampiyona,  AS Kigali izakira Heroes FC iri ku mwanya wa nyuma ku rutonde rw’agateganyo rwa shampiyona.


Ubuyobozi bwa AS Kigali buvuga ko bufitiye icyizere umutoza Eric Nshimiyimana kandi ko ntaho azajya kuko akiri umutoza wabo


Kwizera Pierrot azakina igice cya kabiri cya Shampiyona 


Ubuyobozi bwa AS Kigali butangaza ko butigeze buvugana na rimwe na Cassa Mbungo kandi ko nta gahunda bamufiteho


AS Kigali yatangiye uyu mwaka w'imikino nabi

Tags:




TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND