Airtel Rwanda
Kigali

Amarangamutima ya Sonia Rolland wizihiza imyaka 20 abaye Nyampinga w'u Bufaransa wa mbere ukomoka muri Afurika

Yanditswe na: Muvunyi Arsene
Taliki:12/12/2019 10:35
0

Sonia Rolland Uwitonze wabaye umwiraburakazi wambitswe ikamba rya Nyampinga w’u Bufaransa 2000 yizihije imyaka 20 yanditse aya mateka yiyibutsa uko yari ameze.



Tariki 11 Ukuboza 1999 ni bwo umukobwa w’imyaka 18 Sonia Rolland Uwitonze wari uharagarariye intara ya Bourgogne yatunguranye akambikwa ikamba rya Miss France 2000. 

Yari amateka yanditswe bwa mbere muri iri rushanwa ubwo uyu mukobwa ukomoka ku munyarwandakazi n’umufaransa yabaga umwiraburakazi wa mbere wari ugiye guserukira u Bufaransa mu irushanwa rya Miss Universe.

Imyaka 20 iruzuye neza, Sonia Rolland ubu wahariye ubuzima bwe ibijyanye no gukina filime yasubije amaso inyuma yibuka uyu munsi utazibagirana wahinduye ubuzima bwe burundu akaba ari uwo ari we ubu.

Mu butumwa burebure bwumvikanamo amarangamutima yanditse kuri konti ye ya Instagram, Sonia Rolland yagaragaje ibyiyumviro yari afite ubwo yambikwaga ikamba rya Miss France 2000.

Ati “ Numvaga ndi gutengurwa cyangwa amaguru yanjye nta mbaraga zirimo cyagw se byose. Ingoma zivuga hasigaye abakandida babiri baturuka mu duce tutaratwara ikamba rya Miss France. Miss Province Tatiana nanjye twifashe mu mayunguyungu kugira ngo tutagwa kuko amaguru yacu yari yoroshye. Nari mfite ibyunzwe mu biganza, naheze umwuka, numvaga nshaka kwihisha mu ikanzu, nari mfite ubwoba. Ngiye kumva ngo Miss France ni uhagarariye Bourgogne!”

Akimara kumva ko ari we Nyampinga w’u Bufaransa w’umwaka wa 2000 ibyishimo byarenze Sonia Rolland, yumva urusaku rw’abo mu muryango, inshuti ze n’abandi bari bahanganye, bagafotozi baramushagara ari nako bamuhurizaho imirabyo, ayoborwa ibimubayeho. Kuri we yumvaga atanabasha kureba neza.

N’ubwo uyu mwana w’umukobwa w’imyaka 18 yari abonye amahirwe yo kwitwa Nyampinga w’u Bufaransa hari benshi batiyumvishaga uburyo, umwiraburakazi yabahagararira batangira no kumurwanya.

Aherutse gutangaza ko akimara gutorwa yakiriye amaburuwa menshi arimo ibitutsi, imodoka ye igaterwa amabuye ndetse agasanga urugi rw’inzu ye abantu barusize amazirantoki.

Muri iki gihe Sonia Rolland yizihiza imyaka 20 yambitswe ikamba rya Nyampinga w’u Bufaransa byaba ari byiza cyane n’uhagarariye intara akomokamo mu irushanwa rya 2020 nawe yegukanye ikamba.

Ikamba rya Nyampinga w’u Bufaransa Sonia Rolland yaribyaje umusaruro akomeza kuba icyamamare biciye mu bijyanye na sinema n’imideli. Yashinze umuryango witwa Maisha Africa ufasha abana bafite ibibazo bitandukanye mu Rwanda.

Sonia Rolland yasazwe n'ibyishimo ubwo yambikwaga ikamba rya Miss France 2000

Ababyeyi ba Sonia Rolland barimo nyina w'umunyarwandakazi batewe ishema n'umwana wabo


Sonia Rolland ni we mukobwa w'umwiraburakazi wambitswe ikamba rya Miss France bwa mbere








Inyarwanda Art studio
Inyarwanda BACKGROUND